Ronald Araujo pritet t’i kryejë të dielën testet mjekësore para transferimit te Liverpooli

Liverpooli është pranë finalizimit të marrëveshjes me mbrojtësin e Barcelonës, Ronald Araujo, i cili pritet të bashkohet me klubin anglez në formë huazimi për një sezon.

Kontrata do t’u japë “Të Kuqve” mundësinë ta blejnë përfundimisht futbollistin uruguaian 27-vjeçar, me opsionin e vendosur në 55 milionë euro në përfundim të sezonit.

Gazetari James Pearce raporton se Araujo pritet të udhëtojë drejt Liverpoolit të dielën, ku do t’u nënshtrohet kontrolleve mjekësore përpara se transferimi të bëhet zyrtar.

Edhe pse pozita e tij kryesore është ajo e qendërmbrojtësit, Araujo mund të aktivizohet edhe në krahun e djathtë të mbrojtjes. Në këtë rol, Liverpooli ka aktualisht pak alternativa pas dëmtimit në gju të Conor Bradley, i cili pritet të mungojë gjatë muajve të parë të sezonit 2026/27.

Problemet me dëmtimet dhe largimet kanë lënë skuadrën me zgjedhje të kufizuara në repartin defensiv. Giovanni Leoni po vazhdon rikuperimin nga dëmtimi i ligamentit të kryqëzuar anterior, ndërsa Joe Gomez pritet të mos jetë i gatshëm në nisje të sezonit për shkak të një shqetësimi muskulor.

Ndërkohë, Ibrahima Konate është larguar pa pagesë drejt Real Madridit, kurse Jeremy Jacquet nuk ka luajtur ende në takimet parasezonale për shkak të një dëmtimi.

Me Virgil van Dijk që vazhdon të mungojë pas Kupës së Botës, Liverpooli u detyrua të përdorte mbrojtës adoleshentë gjatë turneut në Shtetet e Bashkuara të Amerikës.