Rodri surprizon Barcelonën me qëndrimin e tij: Nëse transferimi dështon, do të jap maksimumin për Man Cityn

Rodri ka sqaruar pozicionin e tij për të ardhmen te Manchester City. Mesfushori spanjoll dëshiron të largohet nga klubi, por ka siguruar se do të vazhdojë të japë gjithçka për skuadrën nëse gjatë këtij afati kalimtar nuk arrihet marrëveshja e përshtatshme.

Sipas “Sky Sports”, kalimi te Barcelona mbetet përparësia e lojtarit, gjë që ai ia ka komunikuar qartë klubit anglez. Megjithatë, situata nuk do të ndryshojë nëse katalanasit nuk përmbushin pretendimet financiare të Manchester Cityt.

“Dëshira ime është të largohem, por e kuptoj se, nëse nuk paraqitet oferta e duhur, gjatë 12 muajve të ardhshëm do të jap gjithçka që kam për këtë klub”, është mesazhi i spanjollit.

Deri tani, Barcelona ka paraqitur dy propozime për Rodrin, por Manchester City i ka hedhur poshtë të dyja. Oferta më e fundit arrinte në rreth 55 milionë funte, ose afërsisht 64-65 milionë euro, ndërsa klubi anglez kërkon më shumë për të miratuar transferimin.

Informacionet e fundit bëjnë të ditur se City synon të përfitojë të paktën rreth 60-65 milionë funte. Burime të tjera pretendojnë se çmimi i kërkuar mund të shkojë deri në 80 milionë euro, duke përfshirë bonuset. Ndërkohë, Barcelona po përgatit një ofertë që mund të jetë e fundit.

E ardhmja e Rodrit lidhet gjithashtu me lëvizjet që po planifikon Manchester City. Klubi anglez po përpiqet të transferojë Enzo Fernandezin nga Chelsea si pasues të mundshëm të spanjollit, ndërsa “Blutë” kanë caktuar afat deri të premten për paraqitjen e një oferte që përmbush kërkesën e tyre prej 120 milionë funtesh.