Real Madridi rikthen në fokus mesfushorin spanjoll, synon ta afrojë gjatë verës

Interesimi i Real Madridit për mesfushorin e Manchester Cityt, Rodri, ka marrë një hov të ri dhe klubi po lëviz për ta sjellë atë në “Santiago Bernabeu” gjatë merkatos së verës.

David Ornstein, gazetari i njohur i The Athletic, raporton se drejtuesit madrilenë janë optimistë për arritjen e një akordi me lojtarin spanjoll, ndonëse kontaktet zyrtare me kampionët e Anglisë nuk kanë filluar ende.

Vetëm disa javë më parë, burime nga klubi spanjoll kishin hedhur poshtë mundësinë e një transferimi të Rodrit në këtë afat kalimtar.

Por gjendja ka ndryshuar rrënjësisht falë paraqitjeve të shkëlqyera të 30-vjeçarit në Kupën e Botës, ku ai ishte lideri i Spanjës në rrugën drejt titullit dhe u vlerësua si lojtari më i mirë i kompeticionit, duke u nderuar edhe me Topin e Artë.

Këto performanca kanë shtyrë Real Madridin të rishikojë strategjinë dhe ta vendosë mesfushorin në qendër të objektivave për sezonin e ardhshëm.

Aktualisht, Rodri ka një marrëveshje me Cityn që skadon në verën e vitit të ardhshëm. Skuadra angleze synon ta mbajë në “Etihad”, por deri tani lojtari nuk ka treguar shenja se është i hapur për të negociuar një kontratë të re.

Ky ngërç i shërben Real Madridit, i cili shpreson të shfrytëzojë momentin dhe të bindë Cityn të pranojë një marrëveshje për një prej mesfushorëve më të kompletuar të futbollit botëror.