Real Madridi interesohet për Bastonin, Interi cakton vlerën e mbrojtësit italian

Alessandro Bastoni është futur në radarët e Real Madridit, teksa klubi spanjoll është përfshirë në garën për qendërmbrojtësin e Interit. Kjo vjen pasi Barcelona, sipas zhvillimeve të fundit, duket se është tërhequr nga interesi për reprezentuesin italian.

Siç raporton La Gazzetta dello Sport, Interi nuk synon të heqë dorë lehtësisht nga një prej futbollistëve më të rëndësishëm të skuadrës. Për këtë arsye, klubi zikaltër i ka vendosur Bastonit një çmim prej rreth 70 milionë euro.

Ndërkohë, te Real Madridi çdo hap i mundshëm për këtë transferim pritet të kushtëzohet edhe nga qëndrimi i trajnerit të ri, Jose Mourinho. Ai është duke shqyrtuar alternativat për të përforcuar repartin defensiv për sezonin e ardhshëm.

Raporti thekson gjithashtu se raportet mes Interit dhe Real Madridit janë afruar kohët e fundit, sidomos pas kalimit të Denzel Dumfries në “Santiago Bernabeu” për 20 milionë euro.

Në të njëjtën kohë, presidenti i Interit, Beppe Marotta, mësohet se është takuar në kryeqytetin spanjoll me presidentin e Real Madridit, Florentino Perez, ku në bisedë ka qenë edhe e ardhmja e Bastonit.

“Los Blancos” e kanë përforcuar tashmë mbrojtjen me afrimin e qendërmbrojtësit francez Ibrahima Konate si lojtar i lirë, por klubi mbetet në kërkim të opsioneve të tjera për të shtuar konkurrencën dhe cilësinë në prapavijë.

Bastoni vlerësohet si një nga mbrojtësit më cilësorë në Serie A dhe si një pjesë thelbësore e skemave të Interit. Tani mbetet për t’u parë nëse Real Madridi do të pranojë kushtet financiare të klubit italian për ta mbyllur marrëveshjen.