Real Madridi dhe Bayerni kishin një marrëveshje të fshehtë që bllokoi lëvizjen për Michael Olise

Gazetari Christian Falk ka bërë të ditur se pas deklaratës së fundit të Real Madridit, ku mohoheshin kontaktet me Michael Olise, qëndron një “pakt presidencial” mes klubit spanjoll dhe Bayern Munichut.

Sipas Falk, te drejtuesit e Bayern Munichut kishte pasur pakënaqësi pas raportimeve të publikuara në fillim të muajit qershor, ku thuhej se Florentino Perez po përgatiste një ofertë për yllin francez.

Ai shpjegoi se në Mynih këto lajme kishin shkaktuar irritim, ndërsa kishte edhe habi pasi Perez kishte deklaruar publikisht se ishte i gatshëm të ofronte 150 milionë euro për një superyll. Kjo, sipas tij, solli edhe reagimin e fortë publik nga Herbert Hainer.

Falk theksoi se afërsia mes Bayernit dhe Real Madridit u forcua edhe më tepër gjatë dhe rreth dueleve të tyre në çerekfinalet e Ligës së Kampionëve. Presidentët Herbert Hainer dhe Florentino Perez, sipas tij, gëzojnë një marrëdhënie të ngushtë dhe kishin shfaqur respekt të ndërsjellë edhe përpara ndeshjes së parë, gjatë një takimi në restorantin e njohur Zalacain në Madrid.

Sipas gazetarit, pikërisht kjo marrëdhënie ka qenë vendimtare për të shmangur tensionet në lidhje me situatën e Michael Olise.

Ai tha se presidentët nuk dëshironin që çështja rreth Olise të përshkallëzohej, ndaj zhvilluan bisedime private dhe e mbyllën temën. Sipas marrëveshjes së tyre parimore, asnjëri prej dy klubeve nuk do të përpiqet të transferojë një futbollist të klubit tjetër pa e njoftuar më parë palën përkatëse për interesimin.

Po ashtu, Falk nënvizoi se si Real Madridi, ashtu edhe Bayerni, nuk kanë interes të ushqejnë gara ofertash përmes thashethemeve të merkatos në media.

Gazetari gjerman shtoi se raportet mes dy institucioneve vazhdojnë të jenë shumë të forta edhe jashtë fushës.

Si shembull për këtë, ai përmendi faktin se Herbert Hainer do të mbajë një fjalim para rreth 1.200 studentëve, me ftesë të Real Madridit, në stadiumin Santiago Bernabeu më 30 qershor.

Në të njëjtën kohë, Bayern mbetet në kontroll të plotë sa i takon së ardhmes së anësorit francez.

Falk sqaroi se Olise ka kontratë me Bayernin deri në vitin 2029 dhe se lojtari francez nuk posedon klauzolë lirimi. Për këtë arsye, sipas tij, klubi gjerman i ka të gjitha kartat në dorë, ndërsa në prapaskenë të dy klubet kanë arritur qartësi të plotë për këtë çështje.