Reagime të ndara në “Stamford Bridge” pas hyrjes së Enzo Fernandezit në fushë

Morgan Rogers festoi golin e tij të parë me fanellën e Chelseat përpara tifozëve në “Stamford Bridge”, ndërsa ekipi i drejtuar nga Xabi Alonso e përfundoi përgatitjet parasezonale me suksesin 3-1 ndaj Real Sociedadit. Megjithatë, lojtari që tërhoqi më shumë vëmendjen ishte Enzo Fernandez.

Mesfushori argjentinas iu rikthye stërvitjeve me Chelsean në fillim të kësaj jave, pasi kishte pasur një periudhë më të gjatë pushimi për shkak të angazhimeve me Kombëtaren në Kupën e Botës. Në të njëjtën kohë, në media po qarkullonin zëra se Fernandez mund të transferohej te Manchester City, ku do të ribashkohej me ish-trajnerin e tij, Enzo Marescan.

Edhe pse Chelsea i kishte dhënë Manchester Cityt afat deri në orën 17:00 të së premtes, 14 gusht, për të paguar shumën e kërkuar prej 139.5 milionë eurosh, Fernandez vijon të llogaritet në planet e trajnerit Alonso.

Më 15 gusht, të shtunën, ai u aktivizua në pjesën e dytë të takimit, por rikthimi i tij në fushë u prit në mënyra të ndryshme nga tifozët e pranishëm në “Stamford Bridge”.

Disa prej tyre u ngritën në këmbë për ta përshëndetur me duartrokitje, ndërsa një pjesë tjetër reagoi me fishkëllima dhe vërshëllima.

Një llogari që mbështet Chelsean në X pretendoi se në tribuna pati edhe debate mes tifozëve rreth mënyrës se si duhej të sillej stadiumi ndaj Fernandezit.

“Këtu në Stamford Bridge situata është e pabesueshme. Enzo vërshëllehet sa herë që prek topin dhe më pas dëgjohet ‘Ohhh Enzo Fernandez’. Disa njerëz po diskutojnë mes tyre në tribuna se çfarë duhet të ndodhë”, shkroi tifozi.

Ndërkohë, ndërsa Fernandez ishte në qendër të vëmendjes, Morgan Rogers u shfaq menjëherë në skenë. Vetëm dhjetë minuta pasi bëri debutimin e tij të parë me Chelsean, pas transferimit nga Aston Villa për 136 milionë euro, ai realizoi golin e parë për klubin londinez.

Real Sociedadi e barazoi ndeshjen në minutën e 45-të me Jon Mikel Aramburun, por Joao Pedro shënoi dy gola pas pushimit dhe i dha Chelseat fitoren 3-1.

Chelsea do ta nisë sezonin e ri në Ligën Premier më 24 gusht, me një ndeshje në transfertë kundër Fulhamit.//