Raporti i gjyqtarit për Vinicius Junior: protesta me të bërtitura dhe qëndrim agresiv

Vinicius Junior rrezikon të mos luajë në El Clasico, pasi u ndëshkua me karton të kuq gjatë përballjes së së shtunës mes Real Madridit dhe Villarrealit në Santiago Bernabeu.

Braziliani u përjashtua nga gjyqtari Isidro Diaz de Mera pas një episodi që fillimisht dukej se i kishte dhënë atij golin e dytë të Real Madridit në ndeshje. Mirëpo, ndërhyrja e VAR-it solli anulimin e golit, pasi pamjet treguan se Vinicius i kishte tërhequr flokët kundërshtarit të tij, Saliba.

Pas kartonit të kuq, sulmuesi reagoi ashpër ndaj vendimit të arbitrit. Raporti zyrtar evidenton se protesta e tij nuk përfundoi menjëherë pas përjashtimit, por vazhdoi edhe pasi lojtari u ndëshkua.

“Vinicius, pasi u përjashtua dhe ende ndodhej në fushë, vazhdoi të protestonte ndaj vendimit tim, duke bërtitur me zë të lartë dhe duke u drejtuar drejt zonës ku ndodhesha, me një qëndrim agresiv. Bashkëlojtarët u detyruan ta ndalonin, ndërsa nuk arrita të kuptoja ndonjë shprehje konkrete”, thuhet në raportin e gjyqtarit.

Mediumi Tribuna.com raporton se Vinicius mund të dënohet me dy ndeshje pezullim në La Liga. Një masë e tillë do ta detyronte të mungonte në një nga ndeshjet më të rëndësishme të sezonit, El Clasico-n kundër Barcelonës.

Mungesa e mundshme e sulmuesit brazilian do të përbënte një problem të madh për Real Madridin, duke marrë parasysh peshën e tij në fazën sulmuese dhe ndikimin që ushtron në përballjet e rëndësishme.

Megjithatë, vendimi përfundimtar për pezullimin do të merret nga organet disiplinore të futbollit spanjoll, të cilat do të analizojnë raportin e gjyqtarit dhe rrethanat e incidentit.