Raphinha synon rikthimin për Botërorin 2026 dhe premton se nuk do të ndalet

Sulmuesi brazilian Raphinha ka bërë të ditur se është i vendosur të bëjë maksimumin për t’u rikuperuar dhe për të zbritur sërish në fushë në Kupën e Botës 2026.

Edhe pse pësoi lëndim në fitoren 3-0 të Brazilit ndaj Haitit, anësori ka vendosur të mos largohet nga grumbullimi i kombëtares, duke qëndruar pranë pjesës tjetër të ekipit.

Përmes një postimi në rrjetet sociale, ai ka shprehur vendosmërinë dhe angazhimin e tij për t’u kthyer sa më parë në lojë.

“Gjithmonë kërkoj shumë nga vetja dhe punoj çdo ditë për t’u përmirësuar. Kjo nuk do të ndryshojë kurrë. Do të bëj gjithçka që është në fuqinë time për t’u rikuperuar dhe për t’u rikthyer sa më shpejt”.

“Dua të jem përkrah shokëve të mi, të luftoj për objektivat tona dhe të jap gjithçka për fanellën e Brazilit. Do të qëndroj i fortë”, ka shkruar Raphinha.

Megjithatë, rikthimi i tij në fushë mbetet ende i paqartë, ndërsa synimi i brazilianit është i qartë: të jetë gati për fazën nokaut të turneut.