Paqueta pas dëmtimit të Raphinhas: Brazili duhet të përshtatet menjëherë

Lucas Paqueta ka pranuar se mungesa e Raphinhas përbën një goditje të madhe për Brazilin, por ka nënvizuar se Seleçao duhet të reagojë pa humbur kohë para ndeshjes vendimtare me Skocinë në Kupën e Botës 2026.

Anësori i Barcelonës u largua nga fusha që në pjesën e parë të triumfit të Brazilit ndaj Haitit, pasi pësoi një lëndim në kofshë. Federata Braziliane e Futbollit bëri të ditur se ai do t’i nënshtrohet një trajtimi intensiv, me synimin që të jetë gati për rikthim gjatë fazës me eliminim direkt.

Raphinha, i cili numëron 11 gola në 41 ndeshje me kombëtaren, nuk do të jetë në dispozicion për sfidën e rëndësishme të grupit C ndaj Skocisë më 24 qershor.

“Jemi të gjithë të mërzitur, veçanërisht Rafa (Raphinha), për shkak të këtij pengimi të vogël nga lëndimi, por ai mund të llogarisë në mbështetjen e të gjithëve. Jemi pranë tij”, është shprehur Paqueta.

“Ai është një djalë shumë i përkushtuar dhe jam i sigurt se do të bëjë gjithçka të mundur dhe të pamundur për t’u rikthyer sa më shpejt. Sa i përket rëndësisë së tij, nuk besoj se kam nevojë të them shumë”.

“Ai ka kaluar disa sezone të jashtëzakonshme dhe është përmirësuar vazhdimisht me kombëtaren. Kur mungon një lojtar me kaq shumë peshë, duhet të ristrukturohesh shpejt”.

“Të gjithë i njohim karakteristikat e tij, cilësitë, shpejtësinë, aftësinë për të krijuar hapësira dhe për të finalizuar. Po humbasim një lojtar shumë të rëndësishëm”.

“Megjithatë, nuk po fokusohemi shumë te koha që do të mungojë. Thjesht shpresojmë që të rikthehet sa më shpejt”, përfundoi mesfushori brazilian.

Ndeshja mes Brazilit dhe Skocisë do të jetë përballja e pestë mes këtyre dy kombëtareve në historinë e Kupës së Botës, pas dueleve të zhvilluara në vitet 1974, 1982, 1990 dhe 1998. Që nga Botërori i vitit 1974, vetëm Argjentinë – Holanda është luajtur më shpesh.

Brazili mban aktualisht vendin e parë në grup me katër pikë, por mund të rrëshqasë deri në pozitën e tretë nëse mposhtet nga skocezët në stadiumin e Miamit.