Pretendime tronditëse: Pesë yje të Real Madridit refuzuan të luanin pasi Xabi Alonso i dha hapësirë Arda Gulerit

Një gazetar francez i specializuar në investigime, Romain Molina, ka hedhur akuza të forta për përplasje në prapaskenat e Real Madridit, duke përfshirë mesfushorin e ri turk, Arda Guler, dhe trajnerin Xabi Alonso.

Sipas burimeve të Molinës, një grup prej pesë futbollistësh me peshë në ekip e kundërshtuan haptazi vendimin e trajnerit për t’i besuar Gulerit minuta të shumta në fushë, duke shkuar aq larg sa të bojkotonin udhëheqësin teknik. Bëhet fjalë për emra si Federico Valverde, Jude Bellingham, Vinicius Junior, Rodrygo Goes dhe Endrick.

Gazetari theksoi se talenti turk ishte në qendër të krizës së brendshme që po përjetonte klubi mbretëror. “Alonso kishte një simpati të veçantë për Arda Gulerin dhe insistonte ta aktivizonte si titullar. Por pjesa tjetër kërkonin me çdo kusht që ai të mbetej në stol. Të gjithë,” pohoi Molina.

Ai shtoi më tej se pavarësisht presionit, Guleri po shfaqej si një nga elementët më të dalluar të Real Madridit. “Duke qenë se Arda ka një natyrë tejet të rezervuar, situata nuk mori shumë publicitet. Megjithatë, dëshira e të gjithëve ishte që ai të largohej,” citohet të ketë thënë gazetari hulumtues.

Deri në këto momente, as Real Madridi dhe as lojtarët e përmendur nuk kanë dhënë ndonjë reagim zyrtar për këto deklarata. Për pasojë, informacionet e ofruara nga Molina mbeten në nivelin e pretendimeve personale dhe nuk përbëjnë fakte të verifikuara.