Pochettino: Tottenhamit duhej t’i jepej titulli i Premier Leagues, Chelsea kishte shkelur rregullat

Mauricio Pochettino ka rikthyer diskutimin për sezonin 2016/17 të Premier Leagues, duke argumentuar se trofeu duhej t’i ishte dhënë Tottenham Hotspur, pasi Chelsea u ndëshkua më vonë për shkelje të rregullave.

Gjatë drejtimit të tij, Tottenham përfundoi në vendin e dytë për dy sezone radhazi. Në edicionin 2016/17, londinezët mblodhën 86 pikë, por e mbyllën kampionatin shtatë pikë pas Chelseat të Antonio Contes.

Pothuajse një dekadë më vonë, trajneri argjentinas këmbëngul se vendimi i drejtë do të ishte shpallja e Tottenhamit kampion, pasi Chelsea e kishte pranuar shkeljen dhe ishte ndëshkuar për të.

“Ne duhej të kishim fituar një titull të Premier Leagues. Nëse ata u ndëshkuan dhe e pranuan shkeljen, atëherë trofeu duhej t’i jepej ekipit që përfundoi i dyti”, deklaroi Pochettino.

Sipas tij, të dyja skuadrat nuk e nisën garën nga e njëjta pikë, pasi nuk vepruan në përputhje me të njëjtat rregulla.

“Nuk konkurruam në kushte të barabarta. Është e vërtetë që Chelsea shënoi gola dhe fitoi ndeshje, por rregullat nuk ishin të njëjta përpara nisjes së sezonit”, u shpreh ai.

Pochettino shtoi se zbatimi i barabartë i rregullave mund t’i kishte dhënë Tottenhamit mundësinë për të bërë përforcime që do të ndikonin në ecurinë e kampionatit.

“Ndoshta, po të kishim pasur të njëjtat kushte, do të kishim afruar lojtarë që do ta përmirësonin ekipin ose do të na ndihmonin të shënonim më shumë. Nuk është ankesë, por thjesht e vërteta”, tha ai.

Trajneri argjentinas theksoi gjithashtu se nuk heziton të shprehë mendimin e tij, edhe nëse deklaratat mund të irritojnë tifozët e Chelseat.

“Nuk kam frikë të them atë që besoj se është e vërtetë. Tifozët e Chelseat mund të zemërohen me mua, por nëse Tottenham do të kishte shkelur rregullat, do ta pranoja të njëjtin argument”, përfundoi Pochettino.