Përparim Rama akuzon Bashën, Gashanin dhe Qeverinë se po rrezikojnë Lojërat Mesdhetare Prishtina 2030

Kryetari i Prishtinës, Përparim Rama, ka reaguar ndaj deklaratave të Dimal Bashës dhe ministrit Blerim Gashani në Kuvendin e Kosovës për organizimin e Lojërave Mesdhetare Prishtina 2030. Ai u ka kërkuar të ndalin, siç i quan, gënjeshtrat dhe ka paralajmëruar se mosplotësimi i detyrimeve nga Qeveria mund ta rrezikojë këtë ngjarje.

Në një postim, Rama i akuzoi Bashën dhe Gashanin se po përdorin foltoren e Kuvendit për të dhënë deklarata të pavërteta dhe për t’ia kaluar atij dhe Kryeqytetit përgjegjësinë që, sipas tij, i takon Qeverisë. Ai tha se letrat me vërejtje, të dërguara Qeverisë së Kosovës nga Komiteti Ndërkombëtar i Lojërave Mesdhetare, tregojnë se ku qëndrojnë problemet dhe kush duhet t’i përmbushë obligimet.

Rama e cilësoi organizimin e Lojërave si një mundësi historike për Kosovën dhe tha se mbështet përfshirjen e qyteteve të tjera. Sipas tij, kjo duhet të bëhet duke respektuar marrëveshjet e nënshkruara dhe Masterplanin e hartuar nga profesionistët, të miratuar nga institucionet e Kosovës dhe Komiteti Ndërkombëtar.

Ai rikujtoi se Prishtina dhe vetë ai kanë vetëm 3 nga 12 votat në Komitetin Organizativ, ndërsa shumicën për marrjen e vendimeve e kanë Qeveria dhe Komiteti Olimpik i Kosovës. Për këtë arsye, sipas Ramës, këto institucione duhet të japin llogari para qytetarëve për vendimet e tyre.

Si rreziqe për organizimin, kryetari i Prishtinës përmendi mospagesën e obligimeve ndaj Komitetit Ndërkombëtar, për të cilat tha se Qeveria ka dhënë garanci, si dhe përpjekjet për të ndryshuar Masterplanin e miratuar. Ai paralajmëroi se afatet për pagesat, infrastrukturën dhe përmbushjen e zotimeve po kalojnë dhe se çdo vonesë e shton rrezikun për Lojërat.

Rama kritikoi edhe kryeministrin Albin Kurti, të cilin e akuzoi se po e përdor ngjarjen për agjendë populiste, po nxit përçarje mes qyteteve dhe po hedh akuza për t’iu shmangur përgjegjësisë. Ai i kërkoi Qeverisë t’i përmbushë detyrimet pa humbur më kohë, në mënyrë që Lojërat të realizohen me sukses dhe Kosova të përfaqësohet denjësisht para botës.

Në mbyllje të reagimit, Rama tha se do të vazhdojë të punojë për Prishtinën dhe Kosovën me të njëjtin përkushtim si nga dita e parë. Ai theksoi se qytetarët meritojnë të vërtetën, Kuvendi meriton dinjitet dhe zotimet e bëra në emër të Kosovës duhet të mbahen, në mënyrë që kjo mundësi t’u lërë brezave një trashëgimi për të cilën të jenë krenarë.