Pato i bashkohet thirrjeve që Endricku të largohet nga Real Madridi

Alexandre Pato, ish-përfaqësues i Brazilit, vlerëson se Endricku duhet të gjejë një skuadër tjetër ku të luajë më rregullisht dhe të vijojë përparimin e tij.

Qëndrimi i sulmuesit brazilian te Real Madridi po shoqërohet me gjithnjë e më shumë pasiguri, ndërsa po qarkullojnë zëra për një largim të mundshëm në merkaton e janarit.

Sipas Patos, Endrickut i mungon një rol i përcaktuar në ekipin madrilen, çka mund ta shtyjë të kërkojë një klub të ri. Ai nënvizoi gjithashtu se futbollisti 19-vjeçar duhet të përfshihet më drejtpërdrejt në vendimet që lidhen me të ardhmen e tij.

“Besoj se i nevojitet një ndryshim, pasi gjetja e një vendi për të te Real Madridi nuk është e lehtë. Nuk e di si e sheh ai situatën, por nuk mund t’ua lërë vazhdimisht vendimet agjentëve të vet. Për mendimin tim, duhet të kërkojë një ekip tjetër”, u shpreh Pato në një festival sportiv në Trento.

Ish-sulmuesi brazilian bëri të ditur edhe se Milani kishte provuar ta merrte Endrickun gjatë merkatos së verës, por nuk arriti të bindte Real Madridin për të realizuar marrëveshjen.

“E di që Cardinale u përpoq ta sillte te Milani, por nuk ia doli. Ai mendon gjithmonë për të mirën e Milanit. Kemi biseduar shkurtimisht në Kopenhagë para disa ditësh. E do shumë Milanin dhe do të bëjë gjithçka që ka në dorë për klubin”, shtoi Pato.