Partizani përballet me mungesa para derbit, Bratu për Skukën: Është stërvitur normalisht, vendimi merret nesër

Trajneri i Partizanit, Florin Bratu, doli para mediave në prag të derbit të parë të sezonit në Abissnet Superiore kundër Tiranës.

Ai foli për lojtarët që kanë probleme fizike, mundësinë e aktivizimit të tyre dhe peshën që ka kjo ndeshje.

Bratu tha se periudha e ndërprerjes së kampionatit i ka dhënë skuadrës mundësinë të punojë dhe të ndreqë disa aspekte që nuk kishin shkuar siç duhet. Sipas tij, tashmë është radha e lojtarëve të tregojnë paraqitje të mira.

Trajneri e cilësoi përballjen shumë të rëndësishme për tifozët, ndoshta më të rëndësishmen e vitit për ta. Ai theksoi se skuadra duhet të luftojë për mbështetësit, të cilët pritet të jenë të shumtë në stadium, dhe se tifozët e Partizanit dëshirojnë fitoren në derbin e parë të tij në krye të ekipit.

Preka dhe Malaj vijojnë të jenë të dëmtuar, ndërsa Pasagiç ka qenë i sëmurë gjatë javës. Për të, stafi po pret të shohë nëse do të rikuperohet. Xhuljano Skuka, i cili kishte pasur një dëmtim, është stërvitur normalisht me skuadrën këtë javë. Bratu tha se gjendja e tij do të vlerësohet nesër.

I pyetur për presionin, Bratu u përgjigj se ai është pjesë normale e futbollit. Ai kujtoi përvojën si lojtar në nivele të larta dhe si trajner i skuadrave të mira, ndërsa nënvizoi se Partizani është klub i madh ku rezultatet kanë rëndësi. Synimi, sipas tij, është që ekipi të japë maksimumin dhe të fitojë.