Partizani përballë një kalendari të vështirë, Karoglan dhe skuadra rrezikojnë më të keqen

Pas 9 javësh në Superiore, Partizani ndodhet në vendin e fundit me vetëm 4 pikë. Situata mund të përkeqësohet edhe më shumë, pasi në katër ditët e ardhshme nis një seri përballjesh tepër të vështira për “Demat e Kuq”.

Testi i parë do të jetë ndaj Teutës, në transfertën e “Niko Dovanës”, ku i pret skuadra që kryeson kampionatin. Pas këtij takimi, ekipi i drejtuar nga Karoglan do të luajë përsëri jashtë fushe, këtë herë përballë Laçit, një kundërshtar i fortë dhe veçanërisht i vështirë në shtëpi.

Më 22 nëntor, Partizani do të presë Vllazninë. Kuqeblutë janë një rival me peshë dhe do të zbresin në fushë në kërkim të pikëve.

Në ditët e fundit të nëntorit është programuar derbi i kryeqytetit kundër Dinamos së Ilir Dajës. Dinamovitët kanë objektiva të mëdha dhe një synim të përcaktuar qartë. Menjëherë pas kësaj, në fillim të dhjetorit, Partizani do të përballet me kampionët e Egnatias.

Seria e sfidave të vështira do të përfundojë më 6 dhjetor, me derbin e madh të kryeqytetit kundër Tiranës. Mbetet për t’u parë se si do të reagojnë “Demat e Kuq”, duke nisur nga dueli me Teutën. Nëse skuadra nuk arrin të ndryshojë situatën, qëndrimi i Partizanit në Superiore mund të vihet seriozisht në rrezik.