Ofertë e papranueshme nga klubi turk për yllin e Milanit, Rafael Leao

Galatasaray ka ndërmarrë një hap konkret për të blerë kartonin e sulmuesit të Milanit, Rafael Leao, gjatë merkatos së verës.

Gazetari italian Nicolo Schira raporton se gjiganti turk ka depozituar një propozim prej 30 milionë eurosh në ditët e fundit për reprezentuesin portugez.

Gjithsesi, drejtuesit e Milanit kanë një çmim shumë më të lartë në kokë për lojtarin, duke kërkuar një shifër që lëkundet mes 50 dhe 60 milionë eurove për të dhënë dritën jeshile për shitjen, edhe pse ai nuk bën më pjesë në projektin afatgjatë të klubit kuqezi.

Për të joshur talentin portugez, skuadra e Galatasarayt është gati t’i vërë përpara një marrëveshjeje të gjatë, e cila shtrihet deri në vitin 2030, me një rrogë vjetore prej 10 milionë eurosh.

Megjithatë, bisedimet për termat personale nuk kanë përfunduar ende, pasi Leao synon një shpërblim financiar të kalibrit më të lartë, të ngjashëm me atë që përfiton Victor Osimhen, si kusht për pranimin e kalimit te klubi turk.

Në garë për shërbimet e Leaos është futur edhe konkurenti i tyre në Superligë, Fenerbahce, skuadër e cila gjatë kësaj vere ka siguruar tashmë shërbimet e sulmuesit të Kosovës, Vedat Muriqi.

Dëshira e vetë Leaos është të vazhdojë karrierën në Premier League ose në La Liga, por për momentin asnjë ekip nga këto kampionate nuk ka paraqitur një ofertë zyrtare.