Oferta rekord e Arsenalit: 470 mijë euro në javë për Vinicius Junior

Raportimet nga Anglia tregojnë se Arsenali ka hyrë seriozisht në garë për shërbimet e Vinicius Junior, duke vënë në dyshim qëndrimin e tij afatgjatë te Real Madrid.

Skuadra londineze, e cila synon të forcohet ndjeshëm në merkaton e ardhshme, po përgatit një goditje të bujshme duke synuar një prej talenteve më të mëdhenj të futbollit bashkëkohor.

Një faktor kyç që ka shtuar spekulimet është kontrata e sulmuesit brazilian, e cila hyn në sezonin e saj të fundit dhe për momentin nuk ka një akord për vazhdimin e bashkëpunimit me klubin spanjoll.

Mediet britanike, konkretisht e përditshmja The Telegraph, bëjnë të ditur se Arsenali po mendon një propozim financiar që do të rishkruante historinë e pagave te klubi. Bëhet fjalë për një rrogë javore prej afërsisht 470 mijë eurosh, e cila në baza vjetore arrin në 24.4 milionë euro, duke e bërë Viniciusin lojtarin më të shtrenjtë që ka pasur ndonjëherë Arsenali.

Ambicia e klubit anglez për të sjellë në kryeqytet një futbollist të kësaj klase tregon synimin e tyre për të rritur ndjeshëm fuqinë në repartin e sulmit.

Vinicius është kthyer në një kolonë të padiskutueshme të formacionit madrilen që nga ardhja e tij. Me 128 rrjeta të shënuara në të gjitha kompeticionet zyrtare me Real Madridin, ai ka luajtur një rol vendimtar në arritjet më të fundit të ekipit, ku spikat fitorja në Ligën e Kampionëve.

Megjithatë, pezullimi i bisedimeve për kontratën e re e ka vendosur atë në radarët e gjigantëve të tjerë të kontinentit. Londinezët duket se janë në ballë të kësaj ndjekjeje, por mbetet ende e paqartë nëse lojtari do të preferojë të vazhdojë rrugëtimin e tij në Spanjë apo do të provojë një eksperiencë të re në Premier Ligë.