Një sfidë e ndërlikuar” – eksperti ligjor tregon sa e vështirë është rruga e Man Cityt në apelin për 115 shkeljet

Manchester City do ta ketë jashtëzakonisht të vështirë të rrëzojë vendimin që e gjeti përgjegjës për shkeljen e rregullave financiare të Ligës Premier, sipas vlerësimit të një avokati të njohur të së drejtës sportive.

Pas përfundimit të shqyrtimit nga një komision i pavarur, klubi anglez u shpall fajtor për pjesën më të madhe të akuzave të paraqitura nga Liga Premier.

Komisioni arriti në përfundimin se gjatë periudhës 2009-2018, Manchester City kishte përdorur edhe marrëveshje fiktive për të rritur artificialisht të ardhurat dhe për të reduktuar shpenzimet. Në këtë kuadër, klubi dyshohet se kishte krijuar marrëveshje të fshehura financimi me partnerë komercialë, me vlerë deri në rreth 1.04 miliardë euro. Gjatë këtyre viteve, City fitoi tri tituj të Ligës Premier.

Vendimi mund të pasohet nga masa të rënda ndëshkuese, si pezullimi nga garat e kampionatit, zbritja e pikëve, përsëritja e ndeshjeve, përjashtimi nga liga, pagesa e kompensimeve për klubet e tjera, rënia automatike në një kategori më të ulët, madje edhe anulimi i titujve të fituar.

Klubi vazhdon ta mohojë fajësinë dhe ka dorëzuar një apel, për të cilin vendimi pritet të merret brenda 12 javësh. Kampionët anglezë kanë deklaruar se disponojnë një “sasi gjithëpërfshirëse provash të pakundërshtueshme” në mbështetje të qëndrimit të tyre.

Megjithatë, James Severn, avokat i njohur i së drejtës sportive, partner në firmën Penningtons Manches Cooper dhe anëtar i Shoqatës së Avokatëve të Çështjeve Gjyqësore në Londër (LSLA), i tha BBC Sport se klubi përballet me vështirësi të mëdha në përpjekjen për ta ndryshuar vendimin.

Sipas Severn, mbrojtja e Cityt do të përpiqet të provojë se shumat e përfituara përmes kontratave të sponsorizimit ishin të ligjshme dhe nuk ishin fryrë në mënyrë artificiale. Për ta rrëzuar vendimin, megjithatë, klubi duhet të tregojë se komisioni ka bërë një gabim thelbësor në zbatimin ose interpretimin e ligjit, parimeve dhe fakteve, ose se ka pasur një shkelje serioze procedurale që ka ndikuar në rezultatin e çështjes.

“City do të duhet të identifikojë një gabim thelbësor në ligj, parim apo fakte, ose një padrejtësi serioze procedurale, që ka ndikuar materialisht në vendimin e komisionit”, deklaroi Severn.

Ai shpjegoi gjithashtu se bordi i apelit ka kompetenca të gjera: mund ta pranojë ose ta refuzojë ankesën, ta ndryshojë vendimin, apo të vendosë çdo masë tjetër që e sheh të arsyeshme. Për këtë arsye, beteja ligjore e Manchester Cityt ende nuk ka përfunduar, por përmbysja e vendimit mbetet një objektiv shumë i vështirë.