Nga drejtësia në sallën e gjyqit te autoriteti në fushë, Mehmet Turkmen arbitron Shqipëri – San Marino

Shqipëria do të presë San Marinon sonte në orën 20:45, në një përballje të vlefshme për raundin e katërt të Ligës së Kombeve, grupi 1. Sfida do të zhvillohet në stadiumin “Air Albania”.

Për ndeshjen e fundit të muajit tetor, ku kuqezinjtë synojnë një rezultat pozitiv, UEFA ka caktuar arbitrin turk Mehmet Turkmen. Ai ka krijuar një reputacion të mirë në vendin e tij, ku drejton kryesisht takime të Superligës turke.

Turkmen nuk është angazhuar vetëm në kampionatin vendas. Arbitri ka marrë përsipër edhe detyra të rëndësishme në kompeticione të tjera ndërkombëtare dhe këtë mbrëmje do të jetë në qendër të një sfide të rëndësishme në Shqipëri.

Mehmet Turkmen është diplomuar për Drejtësi në Universitetin e Stambollit dhe, krahas arbitrimit, ushtron edhe profesionin e avokatit. Në fushë karakterizohet nga autoriteti dhe ekuilibri, ndërsa vendimet i merr me qetësi, pa u ndikuar nga presioni.

Statistikat e tij tregojnë se mesatarisht akordon 2.9 deri në 3.5 kartonë të verdhë për ndeshje. Turkmen favorizon një lojë të rrjedhshme dhe zakonisht nuk e ndërpret ritmin për kontakte të lehta, çka mund të ndikojë në një përballje dinamike mes Shqipërisë dhe San Marinos.

Arbitri turk do të asistohen nga Ibrahim Çaglar Uyarcan dhe Anil Usta. Oguzhan Çakir është caktuar si arbitri i katërt, ndërsa Onur Özütoprak do të jetë në sistemin VAR dhe Erkan Engin në aVAR.