Neymar i dedikon Messit një mesazh prekës para ndeshjes së fundit me Argjentinën

Pak orë para paraqitjes së fundit të Lionel Messit me fanellën e Argjentinës, në miqësoren kundër Beninit, Neymar i ka kushtuar atij një dedikim të veçantë.

Futbollisti brazilian publikoi një mesazh në Instagram, ku vlerësoi kontributin e Messit në futboll dhe rikujtoi periudhën kur të dy ndërtuan së bashku një kapitull të rëndësishëm të këtij sporti.

Neymar shkroi se çdo person që e dashuron futbollin ka pasur mundësinë ta shijojë lojën e Messit gjatë gjithë këtyre viteve.

Ai theksoi se ndeshja e fundit e argjentinasit me kombëtaren e vendit të tij duhej shijuar në çdo moment, ndërsa uroi që homazhet dhe nderimet e planifikuara për të ta bënin të lumtur.

Sipas Neymarit, mirënjohja për Messin nuk vjen vetëm nga Argjentina, por nga e gjithë bota, për atë që ai ka dhënë për futbollin. Braziliani shtoi se Messi e kishte bërë ta dashuronte edhe më shumë këtë sport.

“Ishte privilegj të përballesha me ty, por një nder edhe më i madh ishte të shkruaja historinë bashkë me ty. Faleminderit, Leo Messi”, përfundoi Neymar në mesazhin e tij.

Messi dhe Neymar luajtën së bashku te Barcelona nga viti 2013 deri në 2017. Në atë periudhë, së bashku me Luis Suarezin, ata formuan një prej sulmeve treshe më të njohura në historinë e futbollit.

Përtej bashkëpunimit në klub, dy futbollistët u përballën edhe si kundërshtarë në ndeshjet mes Argjentinës dhe Brazilit, mes tyre edhe në finalen e Kupës së Amerikës të vitit 2021.

Neymar u transferua nga Barcelona te Paris Saint-Germain në vitin 2017, ndërsa Messi u largua nga klubi katalanas në vitin 2021.