Newcastle trondit Arsenalin me çmimin e kërkuar për Alexander Isak

Alexander Isak është bërë objektivi kryesor i Arsenalit për repartin ofensivë, por nënshkrimi me të nuk është aspak i lehtë.

Newcastle United e ka bërë të qartë se Alexander Isak nuk do të jetë një nënshkrim i lehtë për Arsenalin , duke kërkuar një shifër astronomike prej 200 milionë euro për sulmuesin suedez.

Sipas një raporti nga Daily Mirror, Topçinjtë janë duke eksploruar opsione në treg për afatin kalimtar veror dhe Isak është objektivi kryesor i tyre për sulmin.

Isak, i cili iu bashkua Newcastle nga Real Sociedad në gusht 2022, ka treguar rritje të dukshme në Ligën Premier.

Pavarësisht krahasimeve të hershme me Zlatan Ibrahimovic dhe disa ulje-ngritjeve në karrierën e tij në ekipe si Borussia Dortmund, ai ka gjetur formën e tij më të mirë në klubin anglez.

Që nga transferimi i tij, ai ka luajtur 40 ndeshje, duke shënuar 25 gola dhe duke dhënë dy asistime, duke theksuar aftësinë e tij për të qenë vendimtar në sulm.

Megjithatë, performanca e tij nuk ka qenë e qëndrueshme për shkak të problemeve të lëndimeve, megjithëse ndikimi i tij në fushë ka qenë i rëndësishëm sa herë që ai ka qenë në dispozicion.

Progresi i tij në Newcastle ka tërhequr vëmendjen e disa klubeve më të mira në Evropë, me Arsenalin veçanërisht të interesuar për të siguruar shërbimet e tij këtë verë.

Megjithatë çmimi i kërkuar nga Newcastle United prej 200 milionë eurove ka tronditur Topçinjtë që duket se do të ndryshojnë objektiv dhe do të rikthehen në garë për Victor Osimhen. /Telegrafi/