Nevil Dede pas disfatës 2-1 ndaj Elbasanit: Humbjet janë pjesë e garës, jam optimist për rikthimin e Bitrit

Egnatia regjistroi humbjen e parë në kampionat, pasi u mposht 2-1 nga Elbasani në përballjen e javës së katërt të “Abissnet Superiore”. Ndeshja, e luajtur në “Elbasan Arena”, u mbyll me fitoren e verdhebluve. Në përfundim të takimit, trajneri i skuadrës rrogozhinase, Nevil Dede, foli për mediat.

“Çfarë mund të kishim bërë ndryshe? Kur humbet një ndeshje, herët a vonë vjen një ditë kur gabon. Nuk do ta nisja përgatitjen nga e para, pasi do të ndiqja të njëjtën mënyrë. Djemtë luftuan deri në fund dhe duhet ta pranojmë rezultatin”, u shpreh Dede.

Sa i përket gjendjes së Bitrit, trajneri deklaroi: “Jam i mërzitur për atë që i ndodhi. Për dy javë e kishim ruajtur. Do t’i nënshtrohet një kontrolli dhe më pas do të dimë më shumë. Jam optimist se Bitri do të rikthehet, sepse është një lojtar shumë i rëndësishëm për ne.”

Dede foli edhe për gabimet e skuadrës: “Nuk ka lidhje me mentalitetin apo mendësinë. Nuk e di se si kundërshtari ia doli. Ishte diçka që ne nuk arritëm ta rikuperonim. Duhet t’i japim meritë edhe kundërshtarit, sepse ata ia dolën, ndërsa ne jo.”

I pyetur nëse Egnatia vuajti në thyerjen e linjave, ai tha: “Është e vërtetë. Në fund, për këtë arsye gjërat nuk shkuan sipas dëshirës sonë. E kontrolluam ndeshjen, por nuk ishim sa duhet të saktë në finalizim. Kur nuk shënon, as rezultati nuk funksionon. Albanese mund të bënte më mirë; ishte nën mesataren e tij, pavarësisht sa u asistua nga shokët e skuadrës.”

“Ku u prish ekuilibri? Nuk u surprizuam, por paguam çmimin. U mbështetëm vetëm te entuziazmi dhe nuk e menaxhuam siç duhej. Gaboi e gjithë linja e mbrojtjes dhe kjo ishte historia e ndeshjes. Në episodin e javës së katërt shpërdoruam shumë raste dhe pësuam dy gola. Kështu gara bëhet më e bukur, por ky rezultat nuk na vjen mirë. Isha i përgatitur për një situatë të tillë, por shpresoja të vinte pak më vonë, në mënyrë që të shihnim edhe anët pozitive”, përfundoi Dede.