Në aspektin e lojës preferoj Zhegrovën”, Augimeri krahason kosovarin me Conceicaon

Giovanni Augimeri ka analizuar dallimet mes Edon Zhegrovës dhe Francisco Conceicaos, dy anësorëve të Juventusit që kanë spikatur në paraqitjet e fundit të skuadrës në kampionat.

Gjatë një interviste në emisionin “Cose di Calcio” të Radio Bianconera, trajneri dhe analisti italian nënvizoi se të dy futbollistët kanë aftësi të veçanta për të fituar duelet një-me-një, falë kreativitetit dhe teknikës së tyre.

“Bëhet fjalë për dy lojtarë që marrin iniciativa në përballjet një-me-një. Të dy kanë cilësi, kreativitet dhe aftësi të mira dribluese”, deklaroi Augimeri.

Pavarësisht vlerësimit për të dy anësorët, ai bëri të ditur se, për mënyrën e interpretimit të lojës dhe vendimmarrjen në fushë, zgjedhja e tij personale është Zhegrova.

“Conceicao mund të ketë më shumë energji dhe ndoshta është në gjendje të luajë deri në 60 minuta, ndërsa Zhegrova mund të jetë më i përshtatshëm për 30 minutat e fundit, ndoshta për shkak të kohëzgjatjes së ndeshjes. Por, kur flasim për cilësinë e lojës, zgjedhjet dhe idetë, unë preferoj Zhegrovën. Mendoj se ai ka një ritëm më të mirë loje”, u shpreh italiani.

Augimeri sqaroi se Conceicao ka tipare fizike të ndryshme dhe një “motor” tjetër, çka i jep mundësi të krijojë rrezik për kundërshtarët në aspekte të tjera të lojës.

Ai e konsideroi si avantazh për Juventusin faktin që disponon dy anësorë me profile të ndryshme, pasi kjo e detyron mbrojtësin e krahut kundërshtar të përballet me vështirësi të ndryshme gjatë ndeshjes.

“Conceicao ka ndoshta një ritëm dhe një motor tjetër, ndaj mund të shkaktojë probleme në zona të tjera. Në fund, mbrojtësi i krahut duhet të përballet fillimisht me njërin dhe më pas me tjetrin, prandaj të dy mund t’i krijojnë vështirësi”, përfundoi Augimeri.