Myrto Uzuni shënon gol që në ndeshjen e parë të edicionit në MLS (VIDEO)

Sulmuesi i Kombëtares shqiptare të futbollit, Myrto Uzuni, e ka nisur me ritmin e duhur këtë sezon në MLS, duke qenë protagonist me gol që në ndeshjen e parë të skuadrës së Austin.

Ai ka lënë pas krahëve transferimin e dështuar gjatë janarit në kampionatin turk dhe tashmë duket se është fokusuar plotësisht te ekipi amerikan, me të cilin do të vijojë karrierën e tij.

Ashtu siç pritej, Uzuni ishte titullar në duelin e javës së parë të kampionatit, atë që Austin luante kundër Minesota Junajtid.

Uzuni ishte protagonist në disa aksione sulmuese për skuadrën e tij, ndërsa la shenjë në minutën e 76 të duelit, kur ia doli të devijonte para portës topin për golin e avantazhot të përkohshëm 2-1.

Për fatin e keq të Uzunit, ky gol kishte vlerën vetëm të një pike pasi Minesota barazoi në minutën e fundit. Megjithatë, ky ishte starti i duhur i sezonit për Uzunin, pasi synon të tregojë në vitin e tij të dytë në MLS se është përshtatur tashmë plotësisht me futbollin në këtë vend dhe do të bëjë përsëri bomberin, siç kishte treguar në vitet te Granada në Spanjë.