Mourinho rikthehet te Real Madridi: Po aq kërkues në punë, por më i afërt jashtë fushës

Jose Mourinho ka marrë sërish drejtimin e Real Madridit, 14 vite pas largimit, me synimin për ta kthyer klubin në elitën e futbollit. Emërimi i tij vjen pas dy sezoneve të vështira, të cilat sollën përfundimin e epokës së Carlo Ancelottit dhe dështimet që pasuan me Xabi Alonson dhe Alvaro Arbeloan.

Drejtuesit madrilenë kanë zgjedhur t’ia besojnë përsëri skuadrën teknikut portugez, të bindur se ai mund të rivendosë disiplinën, autoritetin dhe frymën fituese në “Santiago Bernabéu”.

Në punën e përditshme, Mourinho vazhdon të shfaqë të njëjtën kërkueshmëri profesionale. Sipas burimeve pranë klubit, vëmendja e tij ndaj hollësive, etikës së punës dhe disiplinës mbetet po aq e madhe sa më parë.

Gjatë javës së parë të përgatitjeve, trajneri planifikoi tri ditë me nga dy seanca stërvitore. Futbollistët, ndërkohë, mbërrijnë në qendrën stërvitore “Valdebebas” dy orë përpara fillimit të punës në fushë.

Stërvitjet nuk kanë kohëzgjatje të madhe, por zhvillohen me ritëm dhe intensitet të lartë. Puna me topin vazhdon të zërë vendin kryesor në metodologjinë e portugezit.

Megjithatë, mënyra se si Mourinho e ushtron autoritetin duket se ka ndryshuar. Ai nuk paraqitet më si trajneri që përpiqej ta impononte kontrollin me çdo kusht.

Personat që kanë bashkëpunuar me të thonë se tani ai kërkon më tepër mirëkuptim dhe bashkëpunim me futbollistët. Standardet vazhdojnë të jenë të larta, por zbatohen përmes një qasjeje më të balancuar.

“Jam këtu për të krijuar një kulturë pune, përgjegjësie dhe ambicieje. Më pëlqen ideja e të punuarit për Real Madridin, jo thjesht në Real Madrid. Me këtë frymë jam rikthyer”, deklaroi Mourinho për kanalet zyrtare të klubit.

Vëmendje të veçantë po marrin edhe lojtarët e akademisë, ndërsa pritet që pjesa tjetër e futbollistëve t’i bashkohet skuadrës pas pushimeve.

Sipas Mourinhos, të rinjtë duhet ta sigurojnë me punë mundësinë për të qenë pjesë e ekipit të parë, njësoj siç ndodhi edhe gjatë periudhës së tij të parë në Madrid. Përkushtimi i plotë ndaj profesionit vazhdon të jetë një nga tiparet që e kanë karakterizuar portugezin përgjatë gjithë karrierës.

Ndryshimi më i dukshëm vërehet jashtë fushës. Gjatë mandatit të parë te Real Madridi, Mourinho përfshihej vazhdimisht në përplasje me gjyqtarët, Barcelonën dhe mediat, ndërsa këtë herë po shfaqet dukshëm më i qetë dhe më i përmbajtur.

Njerëzit pranë tij pohojnë se trajneri synon të hapë një etapë të re, në të cilën përparësi do të ketë bashkimi i klubit dhe jo konfliktet e panevojshme jashtë fushës.

Edhe Mourinho ka pranuar se me kalimin e kohës ka ndryshuar në aspektin njerëzor. “Më parë mendoja më shumë për veten. Isha më egoist. Sot ndihem më altruist. Jam në futboll për të ndihmuar lojtarët e mi, klubin dhe tifozët më shumë sesa për të menduar për veten time”, kishte thënë ai në një intervistë për UEFA-n.

Tashmë i takon portugezit që këtë ndryshim ta vërtetojë me veprime. Mentaliteti fitues, disiplina dhe intensiteti i tij nuk kanë ndryshuar, por këtë herë objektivi është ndërtimi i një Real Madridi të bashkuar, ku autoriteti të mbështetet jo vetëm te kërkesat e mëdha, por edhe te respekti dhe besimi reciprok.