Momente të ftohta te Franca, Cherki shmang Deschamps pas fitores 3-0 ndaj Suedisë

Pas triumfit bindës 3-0 të Francës përballë Suedisë në New Jersey, vëmendjen e mori edhe një episod i sikletshëm mes Rayan Cherkit dhe përzgjedhësit Didier Deschamps.

Franca e siguroi kalimin në fazën e 1/16 së finales të Kupës së Botës falë dy golave të Kylian Mbappes dhe një tjetri nga Bradley Barcola.

Në raundin e eliminimit direkt, fituesit e dyfishtë të Botërorit do të ndeshen të shtunën me Paraguain, pasi amerikanolatinët befasuan duke nxjerrë Gjermaninë jashtë pas penalltive.

Për këtë sfidë, Deschamps u rikthye në bankinë, pasi nuk ishte i pranishëm në fitoren 4-1 ndaj Norvegjisë për shkak të ndarjes nga jeta të nënës së tij.

Në momentin kur Mbappe realizoi golin e parë, ai dhe pjesa tjetër e futbollistëve francezë vrapuan drejt pankinës për të festuar me trajnerin, në një shenjë të qartë mbështetjeje për të.

Megjithatë, pas vërshëllimës përfundimtare, kamerat nga tribunat kapën një situatë që la vend për interpretime, pasi Cherki u duk i bezdisur me trajnerin e tij.

Edhe pse ka pasur një sezon debutues shumë të mirë me Manchester Cityn dhe është renditur ndër lojtarët më kreativë në Evropë, Cherki ende nuk e ka nisur asnjë ndeshje si titullar me Francën në këtë Kupë Bote.

Ai është aktivizuar në të katër takimet e Francës, por çdo herë nga stoli, duke regjistruar vetëm 55 minuta në fushë.

Në videon që u përhap me shpejtësi në rrjetet sociale, Deschamps shihet teksa i afrohet Cherkit për ta përqafuar, në kohën kur ish-lojtari i Lyonit po përshëndeste tifozët në tribuna.

Reagimi i sulmuesit, megjithatë, dukej i ftohtë. Fillimisht ai e largoi lehtë trajnerin, ndërsa në afrimin e dytë të Deschamps, uli çorapet dhe e ktheu kokën në anën tjetër, duke krijuar përshtypjen se nuk dëshironte kontakt me të.