Milani përmbys Parmën në kohën shtesë, Conceiçao “kriset” me dyshen Leao- Theo

Ndeshje e çmendur në “San Siro”. Milani përmbys Parmën, duke fituar 3-2 sfidën e vlefshme për javën e 22-të të kampionatit italian, falë dy golave të shënuar në minutat shtesë. Miqtë ishin duke flirtuar me fitore dhe deri në minutën e 92-të kryesonin 2-1, por në kohën shtesë Reijnders barazon shifrat, ndërsa Chukwueze shënon golin e fitores për kuqezinjtë.

Parma kalon e para në avantazh me Cancellierin, por Milani barazon shifrat me Pulisic, që tregohet i saktë nga pika e bardhë e penalltisë. Pjesa e parë mbyllet në barazim 1-1 dhe në pjesën e dytë trajneri Conceiçao lë në dhomat e zhveshjes dy yjet e skuadrës, Leao dhe Theo Hernandez. Portugezi ka qenë i pakënaqur nga paraqitja e tyre dhe tashmë duket se ka një krisje mes palëve.

Parma kalon sërish në avantazh në pjesën e dytë me Delprato, por kuqezinjtë përmbysin gjithçka në shtesë, shënojnë dy gola me Reijnders dhe Chukwueze, duke ndryshuar fatin e një sfide që dukej e humbur.

Pas këtij suksesi Milani ngjitet në vendin e 6-të në kuotën e 34 pikëve.