Messi i kënaqur pas mbrëmjes historike me Argjentinën: “Jam shumë i lodhur”

Lionel Messi vazhdon të lërë gjurmë në Kupën e Botës 2026, teksa u bë realizuesi më i mirë në historinë e këtij kompeticioni. Ndërkohë, Argjentina vulosi kualifikimin në fazën eliminatore falë triumfit 2-0 ndaj Austrisë.

Edhe pse nuk arriti të shënojë nga penalltia, kapiteni i Argjentinës e mbylli sfidën me dy gola, në një natë të veçantë për të, duke çuar në gjashtë numrin e ndeshjeve radhazi ku ka gjetur rrjetën në Kupën e Botës.

I pyetur për rekordin e arritur dhe ndjesitë pas ndeshjes, 38-vjeçari dha një përgjigje në stilin e tij të zakonshëm.

“Jam shumë i lodhur”, tha Messi me buzëqeshje.

Goli i tij i parë erdhi pas një krosimi të ulët të Facundo Medina, moment që e ngjiti në kuotën e 17 golave në Kupat e Botës të meshkujve dhe femrave, duke u barazuar me ikonën braziliane Marta.

Në minutat shtesë, sulmuesi argjentinas shënoi sërish dhe shkoi në 18 gola, duke vendosur kështu një rekord të ri absolut në historinë e turneut.

“Jam shumë i lumtur me fitoren. Ishte një fitore jashtëzakonisht e rëndësishme, një ndeshje e vështirë për të cilën punuam shumë. Na jep qetësi për atë që na pret më pas”, u shpreh ai.

Argjentina mund ta kishte pasur edhe më të thjeshtë mbrëmjen, nëse Messi do të ishte treguar i saktë nga pika e bardhë në pjesën e parë. Sidoqoftë, veterani vlerësoi mënyrën si reagoi skuadra pasi Austria ngriti nivelin e lojës në pjesën e dytë.

“Të them të drejtën, mënyra se si përfundoi gjithçka sot ishte spektakolare. Kisha penalltinë që mund ta rriste avantazhin tonë, por jam i lumtur me rezultatin dhe me punën e ekipit”, shtoi ai.

Messi, që më vonë gjatë kësaj jave do të mbushë 39 vjeç, ka shënuar deri tani pesë gola në këtë Kupë të Botës. Nga ana tjetër, Argjentina ka mbledhur gjashtë pikë në dy ndeshje të grupit J.

Me këtë fitore, kampionët e botës e kanë siguruar avancimin në fazën e 1/16-ës së finales, edhe pse u mbetet ende një ndeshje për të zhvilluar.