Mesazhi i Lamine Yamal qetëson Spanjën pas barazimit në startin e Kupës së Botës 2026

Lamine Yamal ka larguar çdo shqetësim te tifozët dhe stafi i kombëtares së Spanjës për gjendjen e tij fizike, pas barazimit 0-0 ndaj Kepit të Gjelbër në ndeshjen e parë të Kupës së Botës 2026.

Pas këtij takimi, lajmi më pozitiv për spanjollët mbetet pikërisht situata e talentit të Barcelonës, i cili duket plotësisht i përgatitur për sfidat e radhës në këtë turne.

18-vjeçari, që kishte lënë pas së fundmi një lëndim, dha një deklaratë të shkurtër, por shumë qartësuese, duke hedhur poshtë çdo dyshim për një problem të mundshëm fizik.

“Gjithçka është perfekte”, tha Yamal për SPORT, duke bërë të ditur se ndihet mirë dhe se nuk ka pasur asnjë shqetësim në këmbë.

Këto fjalë kanë rikthyer qetësinë në kampin e Spanjës, i cili mbeti i zhgënjyer pasi humbi dy pikë në ndeshjen hapëse të turneut. Pas vërshëllimës së fundit, disa prej lojtarëve të rinj të skuadrës, si Gavi, Nico Williams dhe Dani Olmo, e shfaqën hapur frustrimin e tyre.

Megjithatë, portieri i Spanjës, Unai Simón, kërkoi qetësi, duke theksuar se Kupa e Botës është një kompeticion i gjatë dhe se skuadra duhet të mbetet e përqendruar te ndeshjet që e presin.

Ai vlerësoi gjithashtu paraqitjen në mbrojtje të Kepit të Gjelbër, që arriti të bllokojë sulmin spanjoll dhe të sigurojë një pikë me vlerë në debutimin e tij në turne.