Mbrojtësi i Beninit habit para ndeshjes me Argjentinën: “Nuk kemi plan për Messin

Mohamed Tijani, mbrojtësi i Beninit, është kthyer në qendër të vëmendjes pas deklaratës së dhënë para sfidës me Argjentinën, ku pranoi se skuadra e tij nuk ka përgatitur një strategji të posaçme për të ndalur Lionel Messin.

Argjentina do të përballet me Beninin të martën në mbrëmje, në stadiumin “Monumental” të Buenos Airesit. Kjo pritet të jetë ndeshja e fundit e Messit me përfaqësuesen “Albiceleste”.

Me 207 paraqitje dhe 125 gola, 39-vjeçari mban rekordet e kombëtares argjentinase për ndeshje dhe realizime. Për këtë arsye, sfida e radhës pritet të ketë një rëndësi të veçantë në karrierën e tij me fanellën e Argjentinës.

Gjatë një interviste për mediumin argjentinas C5N, Tijani u pyet se çfarë plani do të ndiqte Benini për të frenuar yllin e Inter Miamit, por përgjigjja e tij ishte befasuese.

“Nuk kemi nevojë ta markojmë Messin. Ne do ta shijojmë ndeshjen. Nuk ekziston ndonjë plan i veçantë për t’u mbrojtur ndaj tij; duhet vetëm ta shijojmë këtë përballje dhe kaq”, deklaroi ai.

Ish-mbrojtësi i Rayo Vallecanos më pas foli me admirim për kapitenin e Argjentinës, duke e vendosur atë në majën e futbollit botëror.

“Messi, ti je Zoti. Për mua, ai është më i miri në botë”, tha Tijani.

Në intervistë foli edhe mjeku i kombëtares së Beninit, i cili mbështeti vlerësimin e mbrojtësit: “Ai është më i miri në botë. Ai është Zoti i futbollit”.