Mbappe vlerëson Messin dhe Ronaldon: Leo do të shënonte, unë po e ndjek nga pas

Kylian Mbappe ka bërë të ditur se nuk dëshiron të merret me debatet që lidhen me Erling Haalandin dhe Norvegjinë, duke theksuar se vëmendja e tij është e përqendruar tërësisht te përballja e radhës e Francës ndaj Irakut në Kupën e Botës 2026.

Kur u pyet për mundësinë e një dueli me Haalandin në etapat e mëvonshme të turneut, sulmuesi francez nënvizoi se një skenar i tillë nuk është aktualisht në mendjen e tij.

“Për momentin nuk po mendoj për Haalandin. Ndoshta ata po mendojnë për ne, por unë po mendoj për Irakun”, deklaroi Mbappe.

Kapiteni i Francës u ndal gjithashtu te diskutimi i vazhdueshëm për lojtarët më të mëdhenj të brezit të tij, duke vendosur në krye Lionel Messin dhe Cristiano Ronaldon.

“Messi është lojtari më i mirë, së bashku me Cristianon, kjo është e qartë”.

Ai shtoi se objektivi i tij kryesor mbetet suksesi me ekipin kombëtar, ndërsa debatet e tjera i konsideron çështje për mediat.

“Unë përpiqem ta ndihmoj skuadrën time të fitojë një tjetër Kupë Bote. Të tjerat janë debate për gazetarët”.

I pyetur për të ardhmen e tij në plan afatgjatë dhe rekordet që mund të thyejë gjatë karrierës, Mbappe u përgjigj me nota humori.

“Nuk do të jem këtu në moshën 40-vjeçare, do të më kenë larguar shumë më herët”.

“Nuk bëj plane afatgjata. Dua ta shijoj këtë Kupë Bote”.

Në fund, ylli francez foli edhe për momentin e Lionel Messit, duke pranuar se nuk ishte aspak i surprizuar që argjentinasi realizoi sërish.

“E dija që Leo do të shënonte, ai gjithmonë shënon. Unë jam duke e ndjekur nga pas”, përfundoi Mbappe.