Mbappe i përgjigjet kritikave: Pas 10 vitesh përsosmëri, vëmendja përqendrohet te ato që nuk bën

Kylian Mbappe ka reaguar ndaj komenteve për paraqitjet e tij pa top, duke theksuar se pas një dekade me performanca të jashtëzakonshme, opinioni publik priret të vërë në pah më shumë mangësitë e tij sesa cilësitë që e kanë bërë të shkëlqejë.

Sulmuesi francez, i cili këtë sezon numëron pesë gola në të gjitha kompeticionet, e konsideron kritikën një pjesë të pandashme të karrierës së një lojtari të nivelit të tij.

“Nuk mendoj se është normale, por është jeta e dikujt që ka përjetuar përsosmëri për vite me radhë. Unë nuk jam më asgjë e re. Të gjithë e kanë ditur prej vitesh se çfarë mund të bëj. Mendoj se kjo është ana njerëzore e gjithë historisë”, deklaroi Mbappe për “L’Equipe”.

Futbollisti i Real Madridit shpjegoi se pritshmëritë ndryshojnë kur një lojtar ka dëshmuar për një kohë të gjatë aftësitë e tij, ndaj fokusi kalon te gjërat që ende nuk i realizon.

“Është e natyrshme që njerëzit gjithmonë të shohin atë që dikush nuk bën. Kur e kanë bërë për 10 vjet, njerëzit nuk e shohin më atë që bëjnë. Ata e dinë se janë të aftë ta bëjnë. Kështu që gjithmonë përpiqen të shohin atë që nuk bëjnë”, shtoi francezi.

Megjithatë, Mbappe nënvizoi se komentet negative nuk e frikësojnë dhe as nuk ndikojnë në zgjedhjet e tij gjatë ndeshjeve.

“Ka kritika konstruktive dhe ka edhe të palogjikshme. Kritika nuk më tremb. Kur marr një vendim, nuk mendoj për mundësinë e të qenit i kritikuar. Nëse e di që vendimi është i duhuri për mua, ose edhe nëse nuk është, por është i domosdoshëm, karriera ime ka provuar se unë vazhdoj të ec përpara”, u shpreh Mbappe.

Francezi ka realizuar deri tani pesë gola këtë sezon: katër në La Liga dhe një në Ligën e Kampionëve. Ai vijon të jetë ndër futbollistët më të ndjekur dhe më të diskutuar në botën e futbollit.