Mbappe feston rekordin me Francën, por synon edhe majën historike të Kupës së Botës

Kylian Mbappe ka shprehur krenarinë e tij të madhe pasi është bërë golashënuesi më i mirë në historinë e Kombëtarja e Francës, duke lënë pas rekordin e mëparshëm që mbahej nga Olivier Giroud.

Ylli i Real Madridit e preku këtë shifër historike në suksesin 3-1 përballë Senegalit, ku shënoi dy herë në ndeshjen e parë të Francës në Kupën e Botës 2026, të zhvilluar në stadiumin “MetLife”. Falë kësaj dopiete, Mbappe arriti në kuotën e 58 golave me kombëtaren dhe u ngjit i vetëm në krye të historisë së “Les Bleus”, në moshën 27-vjeçare.

Menjëherë pas përfundimit të sfidës, bashkëlojtarët e tij e nderuan me një fanellë simbolike me numrin 58, si vlerësim për këtë arritje të rëndësishme.

Në një mesazh të publikuar në rrjetet sociale, kapiteni i Francës ndau emocionet e tij për rekordin e sapovendosur.

“58 gola. Një krenari e madhe të bëhesh golashënuesi më i mirë në historinë e ekipit tonë kombëtar, një vend që ka parë kaq shumë lojtarë të shkëlqyer të kalojnë atje. Faleminderit të gjithë shokëve të mi të ekipit, stafit dhe FFF-së për besimin e përjetshëm që nga dita e parë. Dhe faleminderit juve për mbështetjen tuaj. Vazhdojmë, ka ende shumë për të bërë…”

Megjithatë, ky nuk është i vetmi synim i madh për Mbappen. Sulmuesi francez tashmë po afrohet edhe me rekordet historike të golave në Kupën e Botës, ku Lionel Messi dhe Miroslav Klose mbajnë vendin e parë me nga 16 realizime.

Pas dy golave të shënuar kundër Senegalit, Mbappé ka shkuar në 14 gola në këtë turne, duke iu afruar ndjeshëm kreut të listës historike të kompeticionit. Duke parë moshën dhe formën që po kalon, shumë analistë vlerësojnë se thyerja edhe e këtij rekordi të madh ndërkombëtar mund të jetë vetëm çështje kohe.