Maran përgatit një listë me 50 lojtarë për Kombëtaren, ftohen edhe tre futbollistë të Dinamos

Shqipëria do të zhvillojë katër takime të Nations League në fund të shtatorit dhe në ditët e para të tetorit. Në kuadër të këtyre ndeshjeve, trajneri Rolando Maran raportohet se ka dërguar rreth 50 ftesa për futbollistët që mund të jenë pjesë e skuadrës.

Edhe pse vetëm një pjesë e tyre do të përfshihen në grumbullimin përfundimtar, tekniku italian synon të krijojë një ide sa më të plotë për grupin e lojtarëve, pasi është ende në fillimet e aventurës së tij me Kombëtaren shqiptare.

Sipas “Top Channel”, në listën e Maranit janë përfshirë edhe tre futbollistë të Dinamos. Naser Aliji, i cili prej disa vitesh është pjesë e kuqezinjve, shoqërohet nga dy emra që pritet të jenë risi: Ysni Ismaili dhe Klevi Qefalija.

Ismaili, mbrojtës i krahut të djathtë, dhe Qefalija, mesfushor, kanë spikatur me paraqitjet e tyre te Dinamo, ku janë titullarë të padiskutueshëm nën drejtimin e Ilir Dajës. Ndërkohë, një tjetër emër i ri i paralajmëruar prej kohësh është sulmuesi i Hearts, Sabah Kerjota.

Ndeshjet e Shqipërisë në Nations League janë programuar si më poshtë:

26 shtator, ora 20:45 – Shqipëri-Bjellorusi

29 shtator, ora 20:45 – San Marino-Shqipëri

3 tetor, ora 15:00 – Finlandë-Shqipëri

6 tetor, ora 20:45 – Shqipëri-San Marino