Man City mund të luajë në Ligën e Kampionëve edhe në rast rënieje nga Liga Premier

Manchester City mund ta mbajë të drejtën për të marrë pjesë në Ligën e Kampionëve sezonin e ardhshëm edhe nëse ndëshkohet rëndë në kampionatin anglez dhe përfundon duke rënë nga kategoria.

Gjithnjë e më shumë figura të rëndësishme të futbollit po shprehin shqetësimin se klubi mund të përfitojë nga një boshllëk në rregullat e licencimit të UEFA-s dhe të vazhdojë të garojë në arenën evropiane.

Sipas BBC Sport, City mund ta sigurojë pjesëmarrjen në edicionin e ardhshëm të Ligës së Kampionëve nëse arrin të fitojë këtë sezon kompeticionin më të rëndësishëm evropian për klube. Kjo do të ishte e mundur edhe nëse ndaj tij merret një masë e ashpër në futbollin vendas.

Rregulloret nuk parashikojnë një përjashtim automatik nga garat evropiane për një klub që kualifikohet përmes rezultateve sportive. Pikërisht kjo situatë ka alarmuar drejtuesit e futbollit, të cilët e konsiderojnë të papranueshme që City të arkëtojë të ardhura të mëdha nga pjesëmarrja në elitën evropiane nëse ndërkohë dënohet rëndë në Angli.

Problemi kryesor ka të bëjë me licencën e UEFA-s, një kusht i domosdoshëm për pjesëmarrjen në kompeticionet evropiane. GiveMeSport raportoi se licenca e Manchester Cityt “është ngritur si një çështje serioze shqetësimi”. Sipas të njëjtit burim, zgjidhja do të kërkonte një koordinim mes palëve, i cili deri tani ka munguar.

Federata Angleze e Futbollit (FA) mban përgjegjësinë për lëshimin e licencave evropiane, por këtë kompetencë ia ka deleguar Ligës Premier. Megjithatë, organi drejtues nuk ka të drejtë t’ia mohojë licencën një klubi që plotëson të gjitha kriteret minimale të përcaktuara.