Maitland-Niles barazon në sekondat e fundit, Evertoni i merr dy pikë Manchester Unitedit

Manchester Unitedi nuk arriti ta ruante avantazhin në transfertën ndaj Evertonit, duke lëshuar dy pikë në minutën e fundit të ndeshjes së vlefshme për xhiron e tretë të Ligës Premier.

“Djajtë e Kuq” po udhëhiqnin 2-1 deri në 90+5’, kur Ainsley Maitland-Niles goditi saktë nga distanca dhe shënoi një eurogol që i siguroi Evertonit një pikë.

45-minutëshi i parë u zhvillua në ekuilibër, me të dyja skuadrat që patën mundësi për të shënuar, por pa mundur t’i konkretizonin rastet e krijuara.

Menjëherë pas pushimit, Bryan Mbeumo zhbllokoi rezultatin me një gol spektakolar në minutën e 46-të, duke e lënë portierin Pickford pa reagim.

Evertoni nuk u dorëzua dhe në minutën e 83-të e barazoi rezultatin. Tyrique George realizoi pas asistimit të Hayden Hackney.

Unitedi reagoi shpejt, teksa pesë minuta më vonë Benjamin Sesko riktheu epërsinë e skuadrës së tij. Sulmuesi shënoi me kokë pas harkimit të Luke Shaw në minutën e 88-të.

Kur ekipi i Carrick dukej se po shkonte drejt fitores, Maitland-Niles mori përsipër goditjen vendimtare dhe me një realizim të jashtëzakonshëm nga distanca në 90+5′ i befasoi “Djajtë e Kuq”.

Pas këtij barazimi, Evertoni renditet i teti me pesë pikë, ndërsa Manchester Unitedi mbetet në vendin e 11-të me katër pikë.