Luis Suarez flet me zhgënjim për formën e Uruguait: “Ndihem i pafuqishëm, sepse nuk mund të bëj asgjë”

Luis Suarez ka shprehur ndjenjat e tij për paraqitjet e Uruguait në Kupën e Botës 2026, ndërsa kombëtarja ndodhet përballë rrezikut të eliminimit pas dy barazimeve në dy ndeshjet e para.

Sulmuesi i Inter Miamit tha se e përjeton me vështirësi faktin që po e ndjek ekipin nga jashtë, pasi dëshira për të dhënë ndihmë mbetet ende shumë e madhe.

“Ndjehem i pafuqishëm sepse nuk ka asgjë që mund të bëj. Kam adrenalinë dhe dëshirë për ta ndihmuar ekipin, por tani për tani vetëm po e shikoj”.

Ai tregoi gjithashtu se nuk e ka aspak të lehtë të shohë reagimet e futbollistëve pas këtyre rezultateve.

“Kur i shoh emocionet dhe zhgënjimin e djemve, nuk është e lehtë. U thashë të qëndrojnë të fortë — do ta kalojnë edhe këtë situatë”.

Suarez u ndal edhe te puna e përzgjedhësit Marcelo Bielsa, duke nënvizuar se çdo trajner ka qasjen e vet në drejtimin e skuadrës.

“Puna e Bielsas? Çdo trajner ka stilin e tij. Tani është e rëndësishme të luajmë sa më mirë kundër Spanjës. Nuk do të doja që gjithçka të vendosej në një ndeshje të vetme, por kjo është situata”, shtoi ai.

Deri tani, Uruguai nuk ka arritur ende të marrë një fitore në këtë Botëror, pasi ka barazuar 1-1 me Arabinë Saudite dhe 2-2 me Kepin e Gjelbër.

Në ndeshjen e tretë, e cila do të jetë vendimtare për fazën e grupeve, uruguaianët do të luajnë ndaj Spanjës, në një përballje që mund të vendosë fatin e tyre në këtë turne.