Luis Enrique mbron Manchester Cityn: Trofetë e fituar në fushë duhet t’u mbeten

Trajneri i Paris Saint-Germain, Luis Enrique, ka shprehur qëndrimin e tij në favor të Manchester Cityt, duke theksuar se titujt e fituar në fushën e lojës nuk duhet t’i konfiskohen klubit anglez, pavarësisht akuzave për shkelje të rregullave financiare të Ligës Premier.

Manchester City rrezikon masa të ashpra, deri te përjashtimi nga elita e futbollit anglez, pasi një komision i pavarur e ka shpallur përgjegjës për më shumë se 100 shkelje të dyshuara gjatë viteve 2009–2018.

Gjatë kësaj periudhe, klubi mund të humbasë edhe disa nga trofetë e fituar. Megjithatë, Manchester City e ka apeluar vendimin dhe vazhdon të mohojë se ka shkelur rregullat.

Përpara ndeshjes së PSG-së me Manchester Cityn në Ligën e Kampionëve, Enrique foli hapur në mbështetje të skuadrës angleze. Trajneri spanjoll ka një marrëdhënie të afërt me Pep Guardiolën, me të cilin ka qenë bashkëlojtar te Barcelona.

“Mendoj se ajo që kanë arritur në fushë gjatë viteve të fundit ka qenë e jashtëzakonshme. Për këtë arsye, besoj se e meritojnë të gjithë trofetë që kanë fituar në fushë”.

“Trofetë e fituar në fushë duhet të mbeten aty dhe ata meritojnë t’i kenë. Shpresoj që ta shmangin atë sanksion. Ky është mendimi im”, deklaroi në fund trajneri i PSG-së.

Ndërkohë, Pep Guardiola pritet të rikthehet në “Etihad Stadium” për ndeshjen e së mërkurës kundër PSG-së, një përballje me rëndësi për të dyja ekipet në Ligën e Kampionëve.