Liverpooli nis negociatat për yllin e Crystal Palace

Liverpooli ka nisur negociatat për transferimin e Ismaila Sarr, sulmuesit anësor të Crystal Palace, teksa synon të sigurojë një alternativë të re për krahun e sulmit.

Sipas raportimit të Fabrizio Romanos, Reds kanë bërë një propozim prej rreth 50 milionë funte (58 milionë euro) për reprezentuesin senegalez. Edhe vetë lojtari është i gatshëm ta realizojë këtë lëvizje.

Klubi nga Anfield u orientua drejt Sarr pasi mundësia për të arritur një marrëveshje për Yankuba Minteh të Brighton dështoi për shkak të kërkesave të “Pulëbardhave”.

Crystal Palace ndërkohë i ka hedhur poshtë dy oferta të Galatasarayt për 28-vjeçarin. Që prej transferimit nga Marseille në vitin 2024, Sarr ka shkëlqyer në “Selhurst Park”, duke dhënë një kontribut të rëndësishëm në repartin ofensiv dhe duke ndihmuar “Eagles” ta fitojnë Kupën FA.

Në 45 ndeshje në të gjitha garat gjatë sezonit të kaluar, ai realizoi 21 gola. Shpejtësia, aftësia në driblim dhe përvoja e dëshmuar në Ligën Premier do t’i sillnin më shumë cilësi sulmit të Liverpoolit.

Krahas Sarr, Reds prej kohësh po ndjekin edhe Bradley Barcolan e Paris Saint-Germain, por vlera prej 140 milionë eurosh po paraqet pengesë.