Librazhdi merr dritën jeshile nga FSHF për ndeshjet e Kategorisë së Parë, Sopoti luan në shtëpi

Inspektorët e Federatës Shqiptare të Futbollit kanë kryer një kontroll në impiantin sportiv të Librazhdit për të konstatuar nëse ai përmbush standardet e duhura për të organizuar takime të Kategorisë së Parë.

Një sërë përmirësimesh në infrastrukturë janë ndërmarrë javët e fundit nga ana e klubit të Sopotit, në partneritet me Bashkinë e Librazhdit, duke synuar përshtatjen e stadiumit me kërkesat e liçensimit.

Ndërhyrjet kanë prekur dhomat e zhveshjeve dhe stolat e rezervave, janë montuar struktura për kamerat televizive, janë përmirësuar hapësirat për spektatorët dhe terreni i fushës është kthyer në gjendje optimale.

Pas shqyrtimit të të gjitha masave të marra, inspektorët konfirmuan se arena e Librazhdit tashmë i ka të gjitha kushtet për të mirëpritur ndeshjet e Sopotit në këtë nivel garimi.

Rrjedhimisht, skuadra librazhdase do të ketë mundësinë që të presë kundërshtarët në fushën e saj gjatë sezonit që sapo ka filluar, duke zhvilluar aktivitetin sportiv në një mjedis të rinovuar dhe më të përshtatshëm për lojtarët, publikun dhe organizimin e sfidave.