Futbolli shqiptar humbet Besnik Çotën, ish-kapiteni dhe ish-trajneri i Sopotit ndahet nga jeta në moshën 56-vjeçare

Besnik Çota, i cili kishte mbajtur shiritin e kapitenit dhe kishte drejtuar si trajner Sopotin e Librazhdit, është ndarë nga jeta. Humbja e tij ka zhytur në zi sportin librazhdas.

Ai ndërroi jetë mbrëmjen e kësaj të mërkure në një spital të Tiranës. Prej një kohe të gjatë përballej me dinjitet me një sëmundje të rëndë, ndërsa trajtohej edhe me dializë.

Në vitet ’90, Çota u dallua si një prej mesfushorëve organizatorë më të mirë. Aftësitë e spikatura teknike dhe vizioni në lojë e karakterizuan karrierën e tij, ndërsa si kapiten udhëhoqi skuadrën në përballje të rëndësishme.

Pasi përfundoi rrugëtimin në fushë, ai vijoi kontributin te ekipet zinxhir dhe skuadra e parë e Sopotit. Brezat e rinj e kujtojnë si një trajner të qetë, të drejtë dhe të përkushtuar. Ndarja e tij nga jeta krijon një mungesë të madhe si në sportin e Librazhdit, ashtu edhe në atë shqiptar, ku vlerësohej jashtëzakonisht si sportist dhe si njeri.

Ngushëllimet më të ndjera i drejtohen familjes Çota, të afërmve dhe të gjithë komunitetit sportiv të Librazhdit për këtë humbje të rëndë. U prehtë në paqe, Besnik Çota. Kontributi dhe kujtimi i tij do të jenë përherë pjesë e historisë së Sopotit dhe futbollit librazhdas.