Largohu nga aty”, ish-ylli brazilian i bën thirrje Endrick të mos qëndrojë te Real Madridi

Rodrigo Fabri, ish-futbollisti brazilian që ka luajtur dikur te Atletico Madridi, i ka bërë thirrje sulmuesit të ri Endrick që të largohet nga Real Madridi nëse vazhdon të marrë kaq pak minuta në fushë.

Endrick, i cili konsiderohet një ndër talentet më premtues të Brazilit, e ka nisur sezonin te Real Madridi me shumë vështirësi. Mbërritja e Carlos Espit gjatë merkatos së verës e ka zbritur atë më poshtë në radhën e sulmuesve, ndërsa 20-vjeçari ka grumbulluar vetëm katër minuta lojë deri tani këtë sezon.

Sipas Fabrit, Endrick duhet të shqyrtojë mundësinë e një kalimi te një klub tjetër ku do të kishte hapësira të rregullta për të luajtur dhe për të vijuar rritjen e tij si futbollist.

“Praktikisht nuk po merr fare minuta. Ai është shumë i ri dhe shihet si një lojtar themelor për rindërtimin e kombëtares braziliane, ndërsa talenti i tij është i padiskutueshëm.”

“Unë do t’i thosha që nëse nuk merr shumë raste për të luajtur, siç po ndodh tani, zgjidhja më e mirë për të është të kalojë te një ekip ku mund të aktivizohet rregullisht dhe të zhvillohet si futbollist.”

Endrick kishte humbur katër ndeshjet e para të sezonit për shkak të një dëmtimi, dhe pas rikthimit ende nuk ka arritur të sigurojë minuta të konsiderueshme në fushë.

Gjendja e tij mund të kthehet së shpejti në temë diskutimi, sidomos duke marrë parasysh peshën që pritet të ketë për të ardhmen e përfaqësueses së Brazilit.