Kosova synon reagimin ndaj Izraelit për të mbajtur gjallë objektivin

Kosova kërkon të rikthehet te fitorja dhe të mbajë në kontroll synimin e saj në Ligën e Kombeve, teksa përballja me Izraelin në Debrecen të Hungarisë konsiderohet vendimtare për vazhdimin e kampanjës. Pas triumfit 1-0 ndaj Irlandës në Prishtinë, Dardanët u mposhtën 3-1 nga Austria në Vjenë dhe tani synojnë një përgjigje të menjëhershme.

Pas dy ndeshjeve të zhvilluara, Austria udhëheq grupin me gjashtë pikë. Kosova dhe Irlanda kanë nga tri pikë, ndërsa Izraeli ende nuk ka grumbulluar pikë.

Synimi kryesor i Kosovës është përfundimi në vendin e dytë, pozitë që siguron pjesëmarrjen në play-off për promovim në Ligën A, si dhe një vazo më të favorshme në kualifikimet për Kampionatin Evropian. Për këtë arsye, dueli me Izraelin ka rëndësi të veçantë: fitorja do t’i sillte Kosovës tri pikë të vlefshme dhe do ta dobësonte një rival të drejtpërdrejtë në garën për pozitën e dytë.

Pas disfatës në Vjenë, në kampin kosovar e dinë se reagimi duhet të jetë i shpejtë. Stafi teknik dhe futbollistët janë të përqendruar te ndeshja me Izraelin, ku synojnë të rikthehen te rezultatet pozitive dhe të vazhdojnë rrugën drejt objektivit.

Lojtarët shpresojnë në fitore

Një fitore në Debrecen do ta përmirësonte ndjeshëm situatën e Kosovës në grup, veçanërisht nëse Austria arrin të marrë pikë në përballjen me Irlandën në Dublin.

Pas kësaj, Dardanët do të përballen sërish me Austrinë, këtë herë në stadiumin “Fadil Vokrri”. Në këtë fazë të garës, çdo pikë mund të ketë peshë të madhe për renditjen përfundimtare.

Milot Avdyli ka deklaruar se skuadra është përgatitur siç duhet dhe se tani është koha për të dhënë përgjigjen e duhur.

“Tash është momenti me u rikthyer te fitorja dhe besoj që bashkërisht do t’ia dalim”, ka thënë Avdyli, duke nënvizuar rëndësinë e një paraqitjeje të mirë dhe të një rezultati pozitiv.

Baton Zabërgja ka treguar se ekipi e ka studiuar kundërshtarin dhe është i vetëdijshëm për vështirësitë që e presin në Debrecen.

“Është koha të reflektojmë nga humbja e Austrisë”, ka deklaruar ai, duke vlerësuar se Izraeli është një kundërshtar i fortë dhe se për fitoren kërkohet përqendrim maksimal deri në fund të ndeshjes.

Edhe më parë Kosova është përballur me situata të vështira nën drejtimin e Franco Fodës

Përfaqësuesja e Kosovës nuk e përjeton për herë të parë një start të vështirë në një kampanjë të drejtuar nga Franco Foda. Në dy garat e mëparshme të nisura nga gjermani me Dardanët, skuadra është gjendur në vështirësi, por në të dyja rastet Foda ka arritur ta nxjerrë ekipin nga kriza dhe ta rikthejë te rezultatet pozitive.

Në Ligën e Kombeve 2024/25, Kosova e hapi kampanjën me humbjen 3-0 ndaj Rumanisë në Prishtinë, në shtator 2024.

Më pas, Dardanët reaguan gjatë vazhdimit të garës, e mbyllën grupin në vendin e dytë pas Rumanisë dhe në play-off mposhtën Islandën në të dyja ndeshjet, duke siguruar promovimin në Ligën B.

Edhe në kualifikimet për Kupën e Botës 2026, fillimi ishte i vështirë. Kosova pësoi humbje 4-0 nga Zvicra në Basel më 5 shtator 2025, por pas asaj ndeshjeje nuk u mposht më në grup.

Dardanët e përfunduan garën në vendin e dytë dhe siguruan pjesëmarrjen në play-off. Në gjysmëfinale eliminuan Sllovakinë, ndërsa në finale u mposhtën nga Turqia.

Tri pikët ndaj Izraelit do ta rikthenin Kosovën në rrugën e duhur

Shembujt e mëparshëm tregojnë se Kosova, edhe kur e nis një kampanjë në mënyrë të pafavorshme, nën drejtimin e Fodës ka ditur të reagojë dhe të rikthehet te rezultatet e mira.

Tash mbetet të shihet nëse një reagim i tillë do të vijë edhe në kampanjën aktuale. Hapi i parë është përballja me Izraelin, i cili gjithashtu kërkon të dalë nga situata e vështirë pas dy humbjeve.

Ndeshja e së enjtes në Debrecen nuk paraqet vetëm një tjetër takim të Ligës së Kombeve. Ajo mund të jetë momenti që do t’i japë një drejtim të ri kampanjës së Kosovës.

Tri pikë ndaj Izraelit do t’ua forconin Dardanëve pozitat në garën për vendin e dytë dhe do t’i çonin me më shumë besim e atmosferë pozitive drejt ndeshjes së ardhshme me Austrinë në Prishtinë.