Kimmich shpjegon pse skuadrat e mëdha kombëtare po e kanë gjithnjë e më të vështirë ndaj ekipeve më modeste

Joshua Kimmich ka vlerësuar se hendeku mes përfaqësueseve elitare dhe atyre më të vogla në futboll po zvogëlohet vazhdimisht, duke bërë që sfidat ndërkombëtare të jenë gjithnjë e më të komplikuara.

Pas barazimit 0-0 të Spanjës me Cape Verden në Kupën e Botës 2026, mesfushori i Bayern Munich foli për rritjen që kanë pësuar kombëtaret në zhvillim, si në organizimin taktik, ashtu edhe në cilësinë teknike.

“Në përgjithësi, po bëhet gjithnjë e më e vështirë të fitohen ndeshjet. Të ashtuquajturat kombëtare të vogla po përmirësohen, si nga aspekti futbollistik ashtu edhe nga ai taktik”, deklaroi Kimmich.

Kapiteni i Gjermanisë përmendi edhe ndeshjet e ekipit të tij ndaj Curacao, si edhe përballje të tjera të papritura në Botëror, duke nënvizuar se niveli i këtyre skuadrave është rritur ndjeshëm.

“Curacao luajti futboll kundër nesh, unë prisja më shumë topa të gjatë. Pashë Haitin kundër Skocisë dhe edhe ata luajtën mirë. Nuk është më e thjeshtë”, shtoi ai.

Sipas Kimmich, përfaqësueset e mëdha nuk mund të mbështeten më te diferenca në emër apo histori, por duhet të avancojnë vazhdimisht nëse synojnë të mposhtin rivalët më pak të favorizuar.

“Kombëtaret e mëdha duhet të bëhen edhe më të mira për t’i fituar këto ndeshje. Kjo tregon se fitorja 7-1 ndaj Curacao nuk është diçka e sigurt. Duhet ta fitosh në fushë”, përfundoi ai.