Katër klube pas Arijon Ibrahimovic, Bayern Munichu favorizon një tjetër huazim

E ardhmja e Arijon Ibrahimovic te Bayern Munichu ende nuk është përcaktuar pas përfundimit të huazimit të tij, ndërsa për 19-vjeçarin kanë shfaqur interes katër klube evropiane.

Gazetari Ekrem Konur raporton se konkurrenca e fortë në përbërjen e Bayernit e bën huazimin e radhës skenarin më të mundshëm për talentin gjerman U21. Një lëvizje e tillë do t’i garantonte atij aktivizim të rregullt.

Werder Bremen dhe Freiburg janë dy skuadrat e Bundesligës që kanë lëvizur më konkretisht. Të dyja klubet kanë bërë oferta për huazim dhe i kanë premtuar Ibrahimovicit një rol të rëndësishëm në formacion.

Interes kanë shfaqur gjithashtu Villarreal dhe PSV Eindhoven, të cilat tashmë kanë komunikuar me drejtuesit e Bayernit. Përveç minutave në fushë, këto dy ekipe mund t’i sigurojnë lojtarit edhe përvojë në kompeticionet evropiane.

Bayern Munichu nuk e ka në plan shitjen e Ibrahimovicit, i cili ka kontratë me klubin deri në vitin 2028.

Gjiganti bavarez e sheh atë si pjesë të projektit të së ardhmes dhe është i gatshëm ta dërgojë sërish në huazim, me synimin që të zhvillohet duke luajtur rregullisht.