Jorge Valdano sheh Barcelonën favorite në El Clasico, por beson te forca e Real Madridit

Jorge Valdano e konsideron Barcelonën favorite të madhe në përballjen ndaj Real Madridit, megjithatë ish-lojtari madrilen nënvizon se skuadra spanjolle ka nivelin për të fituar në çdo stadium.

Valdano vlerësoi forcën e repartit ofensiv të Real Madridit, por theksoi se mesfusha duhet të shfaqë më shumë kreativitet. Sipas tij, kjo do t’u mundësonte sulmuesve të merrnin topin më shpejt dhe me saktësi më të madhe.

“Barcelona është favorite e madhe, por Reali mund të fitojë kudo. Ka një skuadër fantastike”, deklaroi ai.

Ish-futbollisti i Real Madridit beson se mënyra se si madrilenët arrijnë ta çojnë topin te lojtarët e avancuar do të ketë ndikim të rëndësishëm në ecurinë e skuadrës gjatë këtij sezoni.

Valdano shtoi se shfrytëzimi më i mirë i potencialit të sulmuesve mund ta kthejë Real Madridin në një prej ekipeve më të rrezikshme në Evropë.

“Ndoshta nuk ka asnjë skuadër tjetër në Evropë që shënon kaq shumë gola”, u shpreh ai.

Këto komente vijnë para duelit të shumëpritur mes Barcelonës dhe Real Madridit. Katalunasit do të synojnë të përfitojnë nga forma e tyre, ndërsa madrilenët do të kërkojnë të tregojnë se janë të aftë të dalin fitues edhe në një përballje të tillë.