Joao Felix synon rikthimin te Barcelona në verën e vitit 2027 si lojtar i lirë

Joao Felix ka shprehur dëshirën për t’u rikthyer te Barcelona, ndërsa sipas “Sport”, përfaqësuesit e tij i kanë komunikuar klubit katalanas gatishmërinë për një rikthim në verën e vitit 2027.

Portugezi është i lidhur me Al Nassr deri më 30 qershor 2027 dhe synon të rikthehet në futbollin evropian pasi të përfundojë kontrata.

Nëse nuk firmos një marrëveshje të re, Felix do të ketë të drejtë të nisë bisedimet me klubet evropiane për të ardhmen e tij nga 1 janari 2027.

Sulmuesi ka qenë pjesë e Barcelonës gjatë sezonit 2023/24, kur luajti në formë huazimi nga Atletico Madridi.

Gjatë asaj periudhe, ai u aktivizua në 44 ndeshje dhe realizoi 10 gola, por Barcelona nuk zgjodhi ta blejë përfundimisht kartonin e tij.

Pas përfundimit të aventurës në Katalonjë, Felix u transferua te Chelsea dhe më pas te Al Nassr. Në sezonin 2025/26, ai shënoi 26 gola në të gjitha kompeticionet, duke rikthyer formën e tij më të mirë.

Sipas “Sport”, agjenti Jorge Mendes e ka informuar Barcelonën për interesimin e lojtarit për t’u rikthyer në klub.

Megjithatë, mes palëve nuk ka ende negociata konkrete. E ardhmja e kësaj mundësie do të varet nga paraqitjet e Felixit, kërkesat e tij financiare dhe planet që Barcelona do të ketë për repartin ofensiv.

Për lojtarin 26-vjeçar, Barcelona vazhdon të jetë zgjedhja e parë për rikthimin e tij në futbollin evropian.