Izraeli i mohon Irlandës ngjitjen në vendin e dytë, Kosova përfiton nga barazimi

Irlanda nuk arriti ta shfrytëzojë mundësinë për t’u ngjitur në pozitën e dytë të Grupit B, pasi ndeshja ndaj Izraelit përfundoi me rezultatin 1-1.

Për shkak të situatës, Irlanda kishte kërkuar që takimi të luhej në një terren neutral, me qëllim shmangien e tensioneve. UEFA vendosi që përballja të zhvillohej në Serbi.

Ekipi irlandez e nisi takimin në mënyrë agresive dhe krijoi disa raste për shënim përmes Molumbyt dhe Parrottit, por pa mundur t’i konkretizojë ato.

Megjithatë, në minutën e 39-të, Parrott e kaloi Irlandën në avantazh, duke realizuar nga pika e bardhë e penalltisë.

Izraeli reagoi menjëherë pas pushimit dhe në minutën e 47-të arriti ta barazojë rezultatin me anë të Dor Peretzit, i cili shënoi një gol të bukur.

Në vazhdim, izraelitët patën paraqitje më të mirë dhe madje goditën edhe shtyllën, por nuk ia dolën të shënonin golin e fitores.

Pas katër xhirove, Irlanda ka grumbulluar pesë pikë, po aq sa Kosova, ndërsa Izraeli mbetet në fund të tabelës me dy pikë.