Humbja e tretë radhazi në Superiore, Arjan Bellai kritikon arbitrimin pas ndeshjes me Teutën: Ai nuk ishte penallti, VAR-i duhet të gjejë një zgjidhje

Vora pësoi humbjen e tretë radhazi në “Abissnet Superiore”, pasi u mposht 2-0 nga Teuta në takimin e javës së katërt, të luajtur në stadiumin “Niko Dovana”. Pas përfundimit të ndeshjes, trajneri Arjan Bellai analizoi para mediave paraqitjen e skuadrës së tij.

Bellai u shpreh se ekipi i tij nuk ishte më inferior se Teuta dhe se pjesa e dytë nuk shkoi sipas parashikimeve. Sipas tij, mungesa e golit ndikoi në rezultat, ndërsa lojtarët i përgëzoi për atë që treguan në fushë.

“Është një tjetër humbje, por më vjen keq sepse nuk mund të them se ishim më të dobët se Teuta. Pjesa e dytë nuk u zhvillua aspak në mënyrën që e kishim menduar. Kjo ndodh kur nuk arrin të shënosh. Gjithsesi, nuk dua ta lidh gjithçka me humbjen, pasi i përgëzoj çunat për lojën që zhvilluan sot. Besoj se këtë sezon diferencat mes ekipeve janë të njëjta”, deklaroi ai.

Trajneri i Vorës theksoi se skuadra ka pasur një kalendar të vështirë në katër javët e para, ndërsa objektivi i saj mbeten përballjet me ekipet që ndodhen në mesin e klasifikimit.

“Në katër ndeshjet e para kishim një program të vështirë. I kemi parë të gjitha ekipet e Superiores, ashtu si edhe ekipet e tjera. Ne e kemi fokusin te ndeshjet me skuadrat që janë në mesin e tabelës. Jam i kënaqur me atë që çunat shfaqën në fushë”, u shpreh Bellai.

Bellai kundërshtoi vendimin për penalltinë dhe kritikoi mënyrën se si u përdor VAR-i. Ai tha se kontakti ishte shumë i afërt dhe se sistemi i asistencës video nuk e ndihmoi situatën.

“Për mua nuk ishte fare penallti, nuk ekziston. Mund të jetë VAR-i apo kushdo tjetër, por kjo nuk duhet marrë përsipër në atë mënyrë. Në futboll duhet të gjendet një zgjidhje që VAR-i të analizojë edhe planet e tjera. Për mua nuk ishte penallti, edhe distanca mes futbollistëve ishte shumë e afërt. Mund të gabojë dikush, por në atë moment VAR-i nuk ndihmoi. Më erdhi keq, sepse kur rezultati ishte 1-0, ndeshja ishte ende e luftuar. Më shumë më vjen keq për futbollistët”, tha ai.

I pyetur për rastet flagrante dhe faktin që tashmë ka kaluar java e katërt, trajneri e pranoi se skuadra duhet të përmirësohet, veçanërisht në repartin e mbrojtjes.

“E dija se çfarë lojtari ishte Boçi dhe u thashë të mbyllnim qendrën. Ai ashtu mendoi dhe ashtu veproi, ndërsa kjo ishte linja jonë, duke ditur se sulmuesi i Teutës ishte shumë i fortë. Pikërisht kjo na shkaktoi probleme”, shpjegoi Bellai.

“Nga ndeshja në ndeshje përpiqemi të kuptojmë se çfarë shkoi keq. Deri diku e menaxhuam pjesën e parë, ndërsa në të dytën dolëm aty ku duhet të ishim”, përfundoi trajneri i Vorës.