Hajdutët hynë në shtëpinë e Grealish dhe kryen një grabitje si në filma duke rrëmbyer gjëra me vlerë prej 1.1 milion euro

Mbrëmjen e së mërkurës, Manchester City luajti një ndeshje jashtë fushe kundër Evertonit në kuadër të xhiros së 19-të të Ligës Premier dhe teksa Citizens fituan 3-1, familja e Jack Grealish po përjetonte dramë.

Sipas mediave britanike, hajdutët kanë hyrë në shtëpinë e një futbollisti të Cityt dhe kanë kryer një vjedhje të madhe.

Grealish dhe e fejuara e tij u vendosën në një pronë luksoze me vlerë 7 milionë euro, e vendosur në Cheshire, një pjesë rurale e Anglisë midis Mançesterit dhe Liverpoolit, në prag të Krishtlindjeve, dhe hajdutët me sa duket ndoqën shembullin.

E fejuara Sasha Attëood ftoi prindërit, nënën, dy motrat dhe vëllain e Jack në mbrëmjen fatale në shtëpinë e sapo rinovuar, por pavarësisht gjithçkaje, hajdutët morën masa dhe në një vjedhje si në filma dëmtuan yllin e Cityt për 1.1 milionë euro. Kjo është vlera e bizhuterive dhe orëve që vodhën në shtëpinë e tij.

Të pranishmit në shtëpi kanë dëgjuar zhurmë, kanë aktivizuar sistemin e alarmit dhe kanë lajmëruar policinë, por në momentin që kanë mbërritur, hajdutët kishin përfunduar punën dhe ikën. As qentë roje nuk ndihmuan.

“Të gjithë ishin të tmerruar. Është një pronë e madhe, kështu që është e kuptueshme pse askush nuk dëgjoi asgjë në fillim. Qentë filluan të lehin, ata dëgjuan dikë që vraponte nëpër shtëpi. Ne shtypëm alarmin e panikut dhe njësia e urgjencës u përgjigj menjëherë me më shumë makina policie dhe një helikopter”, tha një burim i afërt me familjen Grealish për The Sun.

Meqë ra fjala, Grealish luajti të gjithë ndeshjen me fanellën e Cityt ndaj Evertonit, të cilin Citizens e fituan 3-1 pas një rikthimi të madh. /Telegrafi/